.png){kind=logo}
НЬЮ-ЙОРК, 2025 оны нэгдүгээр сарын 1. /ТАСС/. Оросын шатарчин Ян Непомнящий, Норвегийн их мастер Магнус Карлсен нар Нью-Йорк хотноо болсон блиц төрлийн ДАШТ-ий тэргүүн байрыг хувааж эзэлжээ.
Тэмцээний хасагдах шатны финалын тоглолтод Карлсен эхний хоёр өрөгт хожсон бол дараагийн хоёр өрөг Я.Непомнящийн ялалтаар өндөрлөсөн байна. Нэмэлт гурван өрөгт тэд хайнцсан тул Карлсений санал болгосноор тоглолтыг тэнцээгээр дуусгаж, дэлхийн аварга цолыг хувааж эзэмшихээр тохиролцжээ. Үүний дараахан Олон улсын шатрын холбооноос /ФИДЕ/ гаргасан мэдэгдэлд, түүхэнд анх удаа блицийн дэлхийн аварга цолыг хоёр их мастер хүртэхээр болсныг дурдсан байна. ДАШТ-ий хүрэл медалийг Польшийн Ян-Кшиштоф Дуда, АНУ-ын Уэсли Со нар хүртжээ.
Эмэгтэйчүүдийн блиц төрөлд Хятадын шатарчин Цюй Вэньзюнь түрүүлсэн бол хоёрдугаар байрт мөн Хятадын Лэй Тинзе, гуравдугаар байрт Оросын Екатарина Лагно, Энэтхэгийн Рамешбабу Вайшали нар шалгарсан байна.
Өдгөө 34 настай Я.Непомнящий дэлхийн аварга цолны төлөө хоёр удаа өрсөлдсөн бөгөөд 2021 онд Карлсенд, 2023 онд Хятадын шатарчин Дин Лижэньд хожигдсон юм. Тэрбээр 2010 онд Европын аваргаар шалгарч, 2013 ба 2019 онуудад Оросын шигшээгийн бүрэлдэхүүнд багийн ДАШТ-нд түрүүлж байв.
Өдгөө 34 настай М.Карлсен бол сонгодог шатрын дэлхийн 16 дахь аварга юм. 2022 онд тэрбээр аварга цолоо хамгаалах тоглолтыг Я.Непомнящий-тай хийхээс татгалзсан байна. М.Карлсен рапид төрлөөр ДАШТ-нд 5 удаа, блиц төрлөөр 8 удаа түрүүлсэн шатарчин юм.
Энэ удаад Нью-Йоркт болсон түргэн тоглолтын рапид төрлийн ДАШТ-ий үеэр тэрбээр хувцаслалтын дүрмийг зөрчсөний учир тэмцээнээс хасагдсан бөгөөд үүний дараа “ФИДЕ-гийн зохион байгуулж буй тэмцээнүүдэд цаашид оролцохгүй” гэдгээ мэдэгдсэн юм. Улмаар тус холбооны ерөнхийлөгч Аркадий Дворкович блиц төрлийн ДАШТ-ий үеэр хувцаслалтын дүрмийг зөөлрүүлнэ гэж мэдэгдсэний дараа М.Карлсен тэмцээнд оролцохоор шийдсэн байна.
Эх сурвалж: МОНЦАМЭ Агентлаг Б.Адъяахүү
