.png){kind=logo}
БУХАРЕСТ, 2025 оны нэгдүгээр сарын 13 /TASS/. Румын улсын нийслэл Бухарест хотод "Ардчиллын төлөөх жагсаал" нэртэй олон мянган хүн оролцсон эсэргүүцлийн ажиллагаа болсон тухай “Agerpres” агентлаг мэдээлэв.
Жагсаалд оролцогчид ерөнхийлөгчийн сонгуулийн дүнг хүчингүй болгосон Үндсэн хуулийн цэцийн шийдвэрийг цуцлах, Ерөнхийлөгч Клаус Йоханнисын бүрэн эрхийг үргэлжлүүлэхийг шаарджээ. Жагсаалыг "Румынчуудын нэгдлийн төлөөх эвсэл"-ээс зохион байгуулсан байна. “Румынчууд өнөөдөр эрх чөлөө, ардчиллын төлөө хамгийн том жагсаалд нэгдлээ” гэж эвслийн удирдагч Жорж Симион мэдэгджээ. Уг жагсаалд 100 мянга гаруй хүн оролцсон байна.
"Бидний тавьсан шаардлагыг биелүүлэх хүртэл Бухарест болон бусад хотод жагсаалаа үргэлжүүлнэ" гэж Ж.Симион хэлжээ.
Бухарест хотод цугласан хүмүүс Румыний төрийн далбааг барьж, вувузела бүрээ үлээж, засгийн газар, ерөнхийлөгчийг эсэргүүцсэн уриа лоозон хашхирч байжээ. Жагсагчид хотын гудамжаар алхаж засгийн газрын байр, төрийн тэргүүний ордны гадна ирсэн байна. Жагсагчдын цувааг цагдаа, жандармерийнхан дагалдан явжээ. 10 гаруй цаг үргэлжилсэн жагсаалын үеэр ноцтой зөрчил гараагүй байна.
Өнгөрсөн оны 11 дүгээр сарын 24-нд болсон ерөнхийлөгчийн сонгуулийн эхний шатанд бие даан нэр дэвшигч Кэлин Жоржеску 22.94 хувийн саналаар ялж, барууны төвч үзэл баримтлалтай “Румынийг аврахын төлөөх холбоо”-ны дарга Елена Ласкони 19.18 хувийн саналаар хоёрдугаарт оржээ.
Тэд 12 дугаар сарын 8-нд явуулахаар товлосон хоёр дахь шатны сонгуульд өрсөлдөх ёстой байсан боловч 12 дугаар сарын 6-нд Румыний Үндсэн хуулийн цэцээс санал хураалт, сонгуулийн сурталчилгааг дахин явуулах нь зүйтэй гэж үзэж, шинэ төрийн тэргүүнийг тангараг өргөх хүртэл Ерөнхийлөгч Йоханнисийн бүрэн эрхийг үргэлжлүүлэх шийдвэрийг гаргасан байна. Жоржеску сонгуулийн кампанит ажлаа хууль бусаар санхүүжүүлсэн, сонгуулийн үйл явцад ашигласан дижитал дэд бүтэц цахим халдлагад өртсөн, мөн Орос улс тус улсын эсрэг "цахим ажиллагаа" явуулсан гэх баримтуудыг Румыний тагнуулын албанаас танилцуулсны дараа Үндсэн хуулийн цэц дээрх шийдвэрийг гаргажээ.
Жоржеску, Ласкони нар хоёр дахь шатны сонгуулийг явуулахыг шаардсан байна. Үндсэн хуулийн цэцийн шийдвэрийг давж заалдсан Жоржескугийн нэхэмжлэлийг Бухарестын давж заалдах шатны шүүх хэрэгсэхгүй болгожээ.
Социал демократ нам, Үндэсний либерал нам, Румыний ардчилсан холбооноос бүрдсэн эрх баригч эвслийн удирдагчид ерөнхийлөгчийн сонгуулийг тавдугаар сарын 4 (эхний шат), тавдугаар сарын 18-нд (хоёр дахь шат) явуулахаар тохиролцсон байна.
Эх сурвалж: МОНЦАМЭ Агентлаг Д.Жаргал
