.png){kind=logo}
Японы сүмо бөхийн холбооны Ёкозүнагийн зөвлөл хуралдаж, өнгөрсөн тэмцээний аварга озэки Хоошёорюүд санал нэгтэйгээр ёкозүна цол олгохоор шийдвэрлэлээ.
Тус зөвлөлийн тэргүүн Ямаүчи Масаюки “12 давж, 3 унасан гэдэг даруухан үзүүлэлттэй ч нэмэлт халз барилдааныг оруулах юм бол 17 барилдсан түрүү. Гурав дараалан барилдаж давсан сэтгэлийн хүчийг бид өндөр үнэлсэн” гэж ёкозүна цол олгох болсон шийдвэрээ тайлбарлалаа.
Нэгдүгээр сарын тэмцээний 9 дэх өдөр хүртэл маэгашира цолтнуудад гурав өвдөг шороодож, тогтворгүй барилдаантай гэж шүүмжлэх хүн гарсан ч санал хураалт 100 хувиар наймхан минутад өндөрлөжээ.
Зөвлөлийн гишүүн Токүра Шюничи “Монгол ёкозүна нар бүгд ёкозүна хүний нэр хүндэд халтай зүйл хийж байсан биз дээ? Бүгд шүү. Өрсөлдөн тэмцэх чадвар сайн ч сүмо бол үндэсний спорт. Үүнийг сайн ухааруулах хэрэгтэй. Тацүнами оякатад энэ талаар үүрэг өгөх хэрэгтэй” гэж хэлсэн бол Үэхара Шигэрү “Ёкозүна хүн Японы уламжлал, соёлыг хамгаалах үүрэгтэй. Нэр хүндээ хамгаалж, аварга хүн гэдгээ ухамсарлаж барилдаасай гэж хүсэж байна” гэлээ.
Ямаүчи Масаюки “Хоошёорюү озэки болохоосоо өмнө асуудал биш ч гэсэн шүүмжлүүлж байлаа. Тачиай дээр хэт удаан өрсөлдөгчөө ширтэж, удахаас гадна том цолтой бөх гэмээргүй тачиай хийх явдал гарч байсан. Хоошёорюүд ёкозүна цол өгөхдөө манай зөвлөлийн гишүүд үндэсний спорт болсон сүмо бөхийн утга учир, түүх, соёл уламжлалыг судалж, унших үүрэг, захиас өгч байгаа гэдгийг ойлгоорой” гэж хэлсэн байна.
