.png){kind=logo}
Цагдаагийн ерөнхий газраас залилангийн гэмт хэрэгт холбогдож хохирсон иргэдийн дуудлага, мэдээлэл сүүлийн саруудад их бүртгэгдэж байгааг анхаарууллаа. Иймд иргэд цахим хаягаа ашиглаж, хэн нэгнээс мөнгө зээлэх болох олон нийтийн сүлжээн дэх зар мэдээллийн дагуу холбогдохдоо хувийн мэдээллээ алдахаас урьдчилан сэргийлж, хянамгай байхыг зөвлөж байна.
Тодорхой жишээ дурдвал, Иргэдэд цахим хуудаст зээлийн аппликейшны эрх нэмж өгнө гэсэн зарын дагуу чатаар холбогдоход, тухайн этгээд бүх зээлээ хаагаад нууц үг, нэвтрэх нэрээ өгөхийг хүсдэг байна. Тухайн иргэн уг зарын дагуу бүртгэлтэй бүх зээлээ хааж, зээлийн аппликейшн руу нэвтрэх нэр, нууц үгээ хэлснээр их хэмжээний зээл тухайн иргэний нэрээр авчихаад блок хийгээд сураггүй болсноор иргэд хохирдог байна.
Хохирсон иргэн цагдаагийн байгууллагад дуудлага өгсөн ч нэгэнт хожимдсон байдаг. Харин тухайн иргэн сэрэмжтэй байж нягталсан бол энэ төрлийн залиланд өртөхгүй байх боломжтой юм. Иймд иргэн та цахим сүлжээнд нэр хаяг, мэдээлэл тодорхойгүй зар мэдээнд хууртаж мөнгө, эд хөрөнгөөрөө хохирч, хувийн мэдээллээ алдахгүй байхад онцгой анхаарч сэрэмжтэй байхыг Цагдаагийн ерөнхий газраас сануулж байна.
