.png){kind=logo}
ВАШИНГТОН, 2025 оны нэгдүгээр сарын 31 /Reuters/. АНУ-ын Тээврийн аюулгүй байдлын үндэсний зөвлөл лхагва гарагт Вашингтоны нисэх буудлын ойролцоо армийн нисдэг тэрэгтэй мөргөлдөж сүйрсэн “American Airlines” компанийн нисэх онгоцны мэдээлэл бүртгэгчийг олсон гэж сенатч Мариа Кантвелл Ройтерс агентлагт мэдээлжээ.
Рейганы нэрэмжит нисэх онгоцны буудалд газардах гэж байсан “American Airlines”-ийн онгоцонд сууж явсан 64 хүн болон Виржиниагийн агаарын баазаас хөөрсөн “Black Hawk” нисдэг тэргэнд сууж явсан гурван цэргийн алба хаагч нараас амьд үлдсэн хүн байхгүй гэж албаны хүмүүс мэдэгдсэн байна. Энэ бол 2001 оноос хойш АНУ-д болсон хамгийн олон хүний аминд хүрсэн осол юм.
Мөрдөн шалгах ажиллагаа дөнгөж эхэлж байна. Тээврийн аюулгүй байдлын үндэсний зөвлөлийн албаны хүмүүс мэдэгдэхдээ, хохирогчдын цогцсыг гаргаж авах, хар хайрцгийн нислэгийн мэдээлэл бүртгэх төхөөрөмжийг хайж олох, ослын газар дахь нотлох баримтыг хадгалахыг чухалчилж байна гэлээ. Мөрдөн байцаагчид 30 хоногийн дараа ослын шалтгааны талаар урьдчилсан тайлан гаргахаар төлөвлөж байна.
Холбооны нисэхийн захиргаанд янз бүрийн хүмүүсийг ажилд авсан нь алдаа болсон гэж Ерөнхийлөгч Дональд Трамп мэдэгдээд, тус агентлагт нийгмийн янз бүрийн төлөөллийг ажиллуулах бодлогоос учирсан хохирлыг тооцохыг үүрэг болгожээ. Харин Ардчилсан намын хууль тогтоогчид, иргэний эрхийн төлөө тэмцэгчид болон нисэхийн аюулгүй байдлын мэргэжилтнүүд түүний мэдэгдлийг зэмлэн буруушаасан байна.
Мөн Д.Трамп хохирогчдын ар гэрийнхэнтэй уулзана гэж мэдэгджээ. Тэдний ихэнх нь Канзас муж улсын оршин суугчид юм. Амиа алдагсдын дунд өсөх ирээдүйтэй өсвөрийн уран гулгагчид, уран гулгалтын дэлхийн аварга асан Оросын иргэд болон энэ жил гэрлэх гэж байсан сүйт залуус байжээ.
Эх сурвалж: МОНЦАМЭ Агентлаг Э.Хулан
