Өнөөдөр “Харбин 2025”: Цаначид болон тэшүүрчид хурдаа сорино

"Харбин 2025" Азийн өвлийн спортын IX наадмын хоёр дахь өдөр буюу өнөөдөр гүйлтийн цана, шорт трeк, гүйлтийн тэшүүр, уулын цана зэрэг төрөлд 11 багц медалийн эзэд тодорно.

Наадмын эхний өдөр 15 багц медалийн эзэд тодорсноос БНХАУ 8 алт, 8 мөнгө, 5 хүрэл медальтайгаар тэргүүлж эхэлсэн бол БНСУ 7 алт, 5 мөнгө, 7 хүрэл, Япон 2 алт, 1 мөнгө, 4 хүрэл медальтайгаар удаалж эхлэв. Казахстан улсын баг тамирчид гурван мөнгөн мeдальтай болсон бол Хятадын Тайвань нэг хүрэл медальтайгаар жагсаалтын тавдугаар байрт бичигдэж эхэллээ.

"Харбин 2025" Азийн өвлийн спортын наадамд 34 орны баг тамирчид өрсөлдөж байгаагаас Арабын Нэгдсэн Эмират, Вьетнам, Индонез, Тайланд зэрэг цас ордоггүй орноос оролцож байгаа нь өвлийн спортын цар хүрээ улам тэлж байгааг харуулж байна.

Монголын багийн шорт трeк, гүйлтийн тэшүүрийн тамирчид өнөөдөр тэмцээнтэй. Шорт трейкийн эмэгтэйчүүдийн 1000 метрийн зайн хагас шигшээд Б.Гэрэлтуяа шалгарсан байгаа. Түүний хувьд 1500 мeтрт зургадугаар байрт орсон ба шорт трекийн төрөлд Азийн өвлийн наадамд хагас шигшээ гараанд шалгарсан Монгол Улсын анхны тамирчин болсон билээ. Б.Гэрэлтуяагийн хувьд Монголын багийн тугчаар сонгогдсон.

Энэ наадамд гүйлтийн тэшүүрийн ганц тамирчин бий. Эрэгтэйчүүдийн 500 м-т Бэхбатын Төгөлдөр эх орноо төлөөлөн Азийн наадмын эхний уралдаанаа өнөөдөр хийнэ.

Монголын гүйлтийн цана, уулын цаначид Ябули цанын баазад байрлан тэмцээндээ оролцож байна. Өнөөдөр гүйлтийн цанын эмэгтэйчүүдийн 5 км зайн уралдаантай. Манай дөрвөн цаначин бүртгүүлсэн байна. Гүйлтийн цанын шигшээ багийн дасгалжуулагч Д.Баттулгаар удирдуулсан баг өчигдөр эхний уралдаанаа хийсэн.

Уулын цанын дасгалжуулагч С.Тэмүүлэнгийн удирдлага дор оролцож буй цаначид туг сүлжих уралдаантай. Өчигдөр эмэгтэйчүүдийнх болсон бол өнөөдөр эрчүүд слаломд уралдана.

Бээжингийн өвлийн олимпын дараа Хятад улс хоёр дахь удаагаа олон улсын хэмжээний мөс, цасны томоохон арга хэмжээг зохион байгуулж байгаа нь энэ аж. Мөн энэ удаагийн наадамд оролцогч орон, тамирчдын тоогоороо өмнөх наадмуудыг давсан үзүүлэлттэй байна. Харбин хотод болж буй Азийн наадмыг угтсан хаврын баярт сая сая жуулчдыг авч байгаагаа зарлаж байна. Тодруулбал, Хаврын баярт зориулсан арга хэмжээнд 12 сая жуулчдыг аваад байгаа юм байна.