.png){kind=logo}
Улаанбаатар, 2025 оны хоёрдугаар сарын 19 /МОНЦАМЭ/. “Mongolian Breeders Cup-2025” ойрын зайн морин хуралдааныг энэ сарын 22, 23-нд Хүй долоон хутагт зохион байгуулахаар болжээ.
Монгол Улсад морин тойруулга, ойрын зайн уралдаан, морин спортыг хөгжүүлэх зорилготой F1 ангилалын 1700 метрийн ойрын зайн уралдаан анх удаа болох гэж байна. Азарга, их нас, соёолон гэсэн гурван насны морь уралдах бөгөөд морийг насанд хүрсэн мэргэжлийн унаачид буюу жокей нар унахаараа онцлогтой. Энэхүү уралдааныг ойрын зайд, шулуун замд хийнэ гэж Монголын морин тойруулга, ойрын зайн уралдаан, уяачдын холбооноос мэдээллээ. Уралдааны талаар Монголын морин тойруулга, ойрын зайн уралдаан уяачдын холбооны тэргүүн Р.Гантулгатай цөөн хором ярилцлаа.
-Уралдааны бэлтгэл ажил ямар шатандаа явж байна вэ?
-Бид өөрсдийн нөхцөл байдалд тохируулан бэлтгэл ажлаа хангаж байна. Ойрын зайн уралдаан “Монгол наадам” цогцолборт болно. Энд тог цахилгаан, үзэгчдийн суудал зэрэг материаллаг бааз нь байгаа учраас сонгосон. Түүнчлэн морины эрүүл ахуйд анхаарч, уяачдаа бэлтгэх зэргээр ажиллаж байна.
-Олон улсад морин уралдаанд тавих стандартыг нарийн заасан байдаг. Уралдаан болох газар стандартын шаардлагагыг хэр хангасан бэ?
-Олон улсад морин спортын стандарт маш өндөр байдаг. Харин манай улсад одоогоор энэ төрлийн стандарт алга. Бид өөрт тохирсон хамгийн боломжит хувилбараар тэмцээнээ хийхээр зорьсон. Тухайлбал, олон улсад элс, шороо, зүлэг гэсэн гурван замд уралдаж болно гэж заасан байдаг. Харин манай уралдаан элсэн зам дээр болно. Бид олон улсын стандартад дөхүүлж цасаа арилган хотгор, гүтгэрт нь хайрга элс тавих зэргээр замаа янзалж байгаа юм. Цаашид морин тойруулга, морь, унаачид тохирсон морин уралдааны стандарттай болох хэрэгцээ шаардлага байна. Ингэхийн тулд юун түрүүнд хууль зүйн орчноо сайжруулах хэрэгтэй.
-Унаачдын аюулгүй байдлыг хэр хангасан бэ?
-Уралдааны морийг насанд хүрсэн хүмүүс унаж байгаа учраас харьцангуй эрсдэл бага. Гэхдээ спорт ямар нэгэн төрлөөс хамааралгүй эрсдэлтэй. Бид “Хан Монгол морьтон” циркийнхэнтэй хамтран анх удаа мэргэжлийн 20 унаач бэлтгэсэн. Тэдэнд мориноос унасан тохиолдолд хэрхэн гар, хөлөө хамгаалах вэ гэх мэт аюулгүйн арга техник заасан. Түүнчлэн олон улсын жишигт нийцсэн хамгаалалтын малгай, хувцас өмсүүлж байна. Монголын морин тойруулга, ойрын зайн уралдаан, уяачдын холбоо нь БНСУ, АНУ, Япон, БНХАУ-ын морин тойруулгын тэмцээнийг судалж, хамтран ажиллахаар зэхэж байна.
Эх сурвалж: МОНЦАМЭ Агентлаг Р.Эрдэнэчимэг
