.png){kind=logo}
НҮБ-ын Хүний эрхийн хороо 2025 оны 3 дугаар сарын 3-наас 28-ны өдрүүдэд Женев хотноо чуулж, Иргэний болон улс төрийн эрхийн тухай олон улсын пакт (ИБУТЭТОУП)-ын хэрэгжилтийн талаарх улс орнуудын тайлан-илтгэлийг хэлэлцэж байна.
Энэ хүрээнд Монгол Улсын Хууль зүй, дотоод хэргийн яамны Төрийн нарийн бичгийн дарга Н.Мягмар тэргүүтэй Засгийн газрын төлөөлөгчид Хорооны чуулганы 3 дугаар сарын 10-11-ний өдрийн хуралдаанаар ИБУТЭТОУП-ын хэрэгжилтийн тухай Монгол Улсын ээлжит 7 дугаар илтгэлийг хэлэлцүүлж, Пактаар хүлээсэн үүргийг хэрэгжүүлэхтэй холбоотойгоор сүүлийн жилүүдэд хууль, эрх зүйн орчинд хийгдсэн шинэчлэл, гарсан ахиц дэвшил, бодлого, үйл ажиллагааны талаар танилцуулан, Хорооны гишүүдийн сонирхсон асуултад хариуллаа.
Хүний эрхийн хорооны зүгээс парламентад эмэгтэйчүүдийн төлөөллийг нэмэгдүүлэх чиглэлд гарсан дэвшлийг сайшааж, үзэл бодлоо чөлөөтэй илэрхийлэх, үг хэлэх, хэвлэн нийтлэх, тайван жагсаал цуглаан хийх эрх чөлөө, хүрээлэн буй орчин, агаарын бохирдол, авлига, хүн худалдаалах гэмт хэрэгтэй тэмцэх хүч чармайлт зэрэг өргөн хүрээтэй асуудлыг хөндөж хэлэлцлээ.
Засгийн газрын төлөөлөгчдийн бүрэлдэхүүнд Хууль зүй, дотоод хэргийн яам, Гадаад харилцааны яам, Байгаль орчин, уур амьсгалын өөрчлөлтийн яам, Улсын Ерөнхий прокурорын газар, Авлигатай тэмцэх газар, Хүүхэд, гэр бүлийн хөгжил, хамгааллын ерөнхий газар, Шүүхийн шийдвэр гүйцэтгэх ерөнхий газар, Гэмт хэргээс урьдчилан сэргийлэх ажлыг зохицуулах зөвлөлийн Ажлын алба, Цагдаагийн ерөнхий газар, Гадаадын иргэн, харьяатын газрын төлөөлөгчид орж ажиллав.
НҮБ-ын Хүний эрхийн хороо манай улсын хэлэлцүүлгийн мөрөөр дүгнэлт, зөвлөмжөө 3 дугаар сарын 21-ний өдөр нийтэд танилцуулна.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!