.png){kind=logo}
МАДРИД, 2025 оны дөрөвдүгээр сарын 22. /ТАСС/. Олимпын долоон удаагийн аварга, Америкийн гимнастикч Симона Байлз, Олимпын хошой аварга, Шведийн тулгууртай харайгч Арман Дюплантис нар 2024 оны шилдэг эмэгтэй, эрэгтэй тамирчдаар шалгарч, Laureus World Sports Academy академийн шагналыг хүртлээ.
Дэлхийн спортын “Лаурес” академийн шагнал гардуулах ёслолын ажиллагаа Мадрид хотод өчигдөр болжээ.
Өнгөрсөн онд Аваргуудын лигийн ба Испаний аварга шалгаруулах тэмцээнүүдэд түрүүлсэн Испанийн “Реал Мадрид” баг “Оны шилдэг баг” номинацид тэргүүлсэн байна. Испанийн шигшээ багийн бүрэлдэхүүнд Европын аварга шалгаруулах тэмцээнд түрүүлж, шилдэг залуу тоглогчоор шалгарсан “Барселона” багийн хагас хамгаалагч Ламин Ямал “Оны шинэ нээлт” шагналыг хүртжээ.
Өнгөрсөн онд тамирчны замналаа дуусгасан Испанийн теннисчин Рафаэл Надаль “Шүтээн” номинацид тэргүүлсэн байна. Тэрбээр Мэргэжлийн эрэгтэй теннисчдийн холбооноос /ATP/ зохион байгуулдаг тэмцээнүүдэд нийт 92 удаа түрүүлснээс Их дуулгын 22 тэмцээнд аваргалсөн бөгөөд энэ үзүүлэлтээр Сербийн теннисчин Новак Жоковичийн /24/ дараа бичигддэг. Тэрбээр Олимпын хошой аварга болсноос гадна Дэвисийн цомд 4 удаа түрүүлж, АTP-ийн хувилбараар 2008, 2010, 2013, 2017, 2019 онуудад шилдэг тамирчнаар шалгарч байв.
Өдгөө 28 настай Америкийн гимнастикч Байлз 23 удаа дэлхийн аварга болсон нь түүхэн дээд амжилт юм. Шведийн тулгууртай харайлтын тамирчин, 25 настай Дюплантис бол дэлхийн хошой аварга, Европын 3 удаагийн аварга бөгөөд 6 м 27 см өндөр дээгүүр харайснаар дэлхийн дээд амжилтыг тогтоожээ.
"Лауреус" шагналыг 1999 онд дэлхийд нэртэй хэд хэдэн компанийн оролцоотойгоор байгуулсан олон улсын сангуудын санаачилгаар бий болгожээ. Эхний үе шатанд шагналд нэр дэвшигчдийг спортын сэтгүүлчид шалгаруулдаг бөгөөд дараа нь өмнөх үеийн алдартай тамирчдаас бүрдэх академийн 50 гишүүн оролцсон санал хураалт болдог.
Оросын тамирчдаас "Лауреус" шагналыг тулгууртай харайгч Елена Исинбаева 2007 ба 2009 онуудад, оны шилдэг залуу тамирчинд олгодог “Оны шинэ нээлт” шагналыг 2001 онд теннисчин Марат Сафин хүртэж байв.
Эх сурвалж: МОНЦАМЭ Агентлаг Б.Адъяахүү
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!