Маргааш дуатлоны Азийн цомын тэмцээн болно

Улаанбаатар, 2025 оны есдүгээр сарын 5 /МОНЦАМЭ/. Монгол Улсад анх удаа дуатлоны Азийн цомын тэмцээн эхлэхэд бэлэн болжээ.

Тэсвэр, хатуужил, шандсыг сорих тус тэмцээнд таван орны 80 гаруй тамирчин сонирхогч болон элит ангилалд оролцоор мэдүүлэг өгсөн бөгөөд тэмцээн маргааш Хүй долоон хутагт болох юм. Монголын триатлоны холбооноос тэмцээний өмнө олон улсын экспертүүдтэй хамтран хүний нөөцийг чадавхжуулах бодлогын хүрээнд шүүгч нарын сургалтыг зохион байгуулж байна.

Тэгвэл тус тэмцээнтэй холбогдуулан ОУОХ-ны гишүүн, МҮОХ-ны ерөнхийлөгч Б.Баттүшиг Дэлхийн триатлоны холбооны сургагч багш болон “Улаанбаатар 2025” Азийн дуатлоны цомын аварга шалгаруулах тэмцээний Ерөнхий шүүгч нарыг хүлээн авч уулзжээ. Уулзалтад тэмцээний ерөнхий шүүгч, БНХАУ-ын иргэн Ян Фэй, Дэлхийн триатлоны холбоо (ДТХ)-ны сургагч багш, олон улсын III зэрэглэлийн шүүгч, Сингапурын иргэн Питер Чуа, II зэрэглэлийн шүүгч, Киргизийн иргэн Алексей Калинин, Японы Триатлоны холбооны удирдах зөвлөлийн гишүүн Торү Саито болон Монголын триатлоны холбоо, МҮОХ-ны удирдлагууд оролцжээ.

Монгол Улсад анх удаа энэхүү тэмцээнийг зохион байгуулж буй нь цаашид томоохон тэмцээн уралдааныг зохион байгуулах эхлэл төдийгүй олон улсын хэмжээнд үйл ажиллагааны цар хүрээгээ нэмэгдүүлэх, гадаадын тамирчдын оролцоог хангах болон дотоодод энэхүү спортыг сурталчлах ач холбогдолтойг талууд онцолсон байна.