Аки башёгийн 8 дахь өдөр Их аваргууд өрсөлдөгчдөө давлаа

Мэргэжлийн сүмо бөхийн Намрын Аки башёгийн Макүүчи зиндааны 8 дахь өдрийн барилдаан /2025.09.21/ Токио хотын Кокүгикан ордонд үргэлжилж Их аваргууд өрсөлдөгчдөө давлаа.

Их аварга Хоошёорюү Аки башёгийн 8 дахь өдөр Гонояама /М-3/-тай учраа тааран барилдаж түүнийг ошидаши мэхээр хаяснаар 8 даваатай болоод байна.

Их аварга Ооносато энэ өдөр Хирадоүми /М-4/-тэй хүчээ сорьж түүнийг ошидаши мэхээр хаяснаар 1 унаа, 7 даваатай болов.

Озэки Котозакүра энэ өдөр Комүсүби Такаясү-тэй учраа таарч хүчээ сорин түүнд шитатэнаге мэхээр унаснаар 5 даваа, 3 унаатай башёг үргэлжлүүлж байна. Такаясү 2 даваа, 6 унаатай болов.

Сэкиваке Вакатакакаге, Атамифүжи /М-3/-тэй учраа тааран хүч үзэж түүнийг ёрикири мэхээр хаяснаар 5 даваа, 3 унаатай боллоо.

Өнөөдөр Сэкивакэ Киришима Б.Лхагвасүрэн, Вакамотохарү/М-5/-тэй учраа таарч барилдан түүнд ёрикири мэхээр унаснаар 4 даваа, 4 унаатай болоод байна. Харин Вакамотохарү 6 даваа, 2 унаатай боллоо.

Хакүохо /М-2/ энэ өдөр Котошохо /М-5/-той учраа тааран барилдаж түүнийг уватэдашинаге мэхээр хаяж 5 даваа, 3 унаатай боллоо.

Энэ өдөр Аби/М-1/, Охо /М-2/-той учраа тааран хүчээ сорихдоо түүнд ошидаши мэхээр унаснаар 8 унаатай болсон бол Охо 4 даваа, 4 унаатай байна.

Украины сүмоч Комүсүби Аонишики энэ өдөр Тамаваши Б.Мөнх-Оргил /М-1/- той таарч барилдан түүнийг ёрикири мэхээр давснаар 2 унаа, 6 даваатай боллоо. Харин Тамаваши 3 даваа, 5 унаатай болоод байна.

Онокацү Б.Чойжилсүрэн /М-6/ энэ өдөр Мидорифүжи /М-9/-тэй барилдаж түүнийг ёрикири мэхээр хаяснаар 5 даваа, 3 унаатай башёг үргэлжлүүлж явна.

Өнөөдөр Ошёома П.Дэлгэрбаяр /М-7/, Дайэйшёо/М-10/-той хүч үзэн барилдаж түүнийг ошидаши мэхээр хаяснаар 4 даваа, 4 унаатай болсон бол Дайэйшёо 2 даваа, 6 унаатай башёг үргэлжлүүлж байна.

Уран барилдаант Ура/М-8/ энэ өдөр Шодай /М-11/-той таарч барилдан түүнд уватэнаге мэхээр унаснаар 6 даваа, 2 унаатай болж Шодай 7 даваа 1 унаатай башёг амжилттай үргэлжлүүлж байна.