.png){kind=logo}
Унгар Улсын Элчин сайдын яамны албан төлөөлөгчдийг Хүнс, хөдөө аж ахуй, хөнгөн үйлдвэрийн сайдын Зөвлөх Б.Батбаатар хүлээн авч уулзлаа.
Уулзалтаар дараах ажлуудыг хамтран зохион байгуулахаар тохиролцов. Үүнд:
- Унгар Улсын Засгийн газрын хөгжлийн хөтөлбөрт Монгол Улсыг хамруулах (манай улс анх удаа хамрагдах гэж байна)
- 5-10 сая ам.долларын буцалтгүй тусламжийн хүрээнд Европын стандартыг бүрэн хангасан тахиа, өндөгний цогц аж ахуй, үйлдвэрийг Монгол Улсад байгуулах, мэргэжилтэй боловсон хүчнийг бэлтгэх,
- УИХ-ын 2022 оны “Хүнсний хангамж, аюулгүй байдлын талаар авах зарим арга хэмжээний тухай” 36 дугаар тогтоолын хүрээнд тахианы мах, өндөгний импортыг орлох, хүнсний аюулгүй байдал, хангамжийн асуудлыг бүрэн шийдвэрлэхэд хамтарч ажиллахаар тохиролцов.
Унгар Улсын Засгийн газрын тэтгэлгээр хүнс, хөдөө аж ахуй, хөнгөн үйлдвэрийн салбарын мэргэжилтэй боловсон хүчний чадавхыг дээшлүүлэх бүх түвшний сургалтын хөтөлбөрт жил бүр салбарын 10-20 мэргэжилтэн, оюутнууд хамруулахаар тохирч, Боловсрол, шинжлэх ухааны яамтай хамтран суралцагчийн квотыг тогтмол 10-20 болгон ажиллахаар тохиролцов.
Мөн Унгар Улсаас хүнс, хөдөө аж ахуй, хөнгөн үйлдвэрийн салбарт мэргэшсэн багш, дасгалжуулагч урьж салбарын боловсон хүчний туршлага, мэдлэгийг дээшлүүлэх сургалтад хамруулах чиглэлээр хамтарч ажиллахаар боллоо.
Монгол Улсын Хүнс, хөдөө аж ахуй, хөнгөн үлдвэрийн яам, Унгар Улсын Хөдөө аж ахуйн яам хооронд Харилцан ойлголцох санамж бичгийг байгуулах, хоёр талт хамтын ажиллагааны талаар хоёр улсын сайд нарын түвшний цахим хурлыг ойрын хугацаанд зохион байгуулахаар тохиролцов.
Мөн хоёр улсын худалдаа, аж үйлдвэрийн танхимын 2023 оны 4 дүгээр сарын 20-ны өдөр зохион байгуулах цахим бизнес форумд Хүнс, хөдөө аж ахуй, хөнгөн үйлдвэрийн яамны харьяа мэргэжлийн холбоодоор дамжуулан аж ахуй нэгж, иргэдийг Унгар улсын салбарын аж ахуй нэгжүүдтэй холбож, цахим уулзалт зохион байгуулахаар болов.
