.png){kind=logo}
Улаанбаатар, 2026 оны тавдугаар сарын 6 /МОНЦАМЭ/. Дилав хутагт сангаас Америк дахь Монгол судлалын төвтэй хамтран хэрэгжүүлж буй “Хутагт Латтимор хоёр: Тив дамнасан өв” төслийн нээлт тавдугаар сарын 12-ны өдөр болох гэж байна.
Төр, шашны нэрт зүтгэлтэн Дилав хутагт Б.Жамсранжав болон Америкийн нэрт монгол судлаач эрдэмтэн Оуэн Латтимор нарын нөхөрлөл, амьдрал, үйл хэрэг, өвөөр дамжуулан хэрхэн Монгол Улс, АНУ-ын хоорондох төр шашин, боловсрол, соёлын харилцаа үүсч хөгжсөн түүхэн ач холбогдлыг олон нийтэд сурталчлан таниулах, V дүрийн Дилав хутагт Жамсранжав судлалыг дэмжих санаачилгын дор зохион байгуулагдаж буй энэ төслөөр гурван гол арга хэмжээг зохион байгуулах ажээ.
Нэгдүгээрт, Олон улсын үзэсгэлэнг тавдугаар сарын 12-ноос зургаадугаар сарын 12-нд Монголын үндэсний музейд зохион байгуулна. Энэ хүрээнд:
- Оуэн Латтиморын гэр бүлээс хандивласан гэрэл зургуудын эх хувь,
- Монголын Үндэсний номын санд хадгалагдаж буй, Дилав хутагтын төрсөн нутаг, түүхтэй холбогдох нутгийн зураг, гар бичмэл өвүүд,
- АНУ-ын Конгрессийн номын сан, Харвардын их сургууль, Иелийн их сургууль, Жонс Хопкинсын их сургууль, Пенсильванийн их сургуулийн сан хөмрөгт буй намтар түүхтэй холбоотой захидал, гэрэл зураг, эд өлгийн зүйлс, баримтуудын хуулбар эхүүд,
- Дилав хутагт Жамсранжавтай холбогдох хувийн цуглуулгын дээжис,
- Орон нутгийн үзмэрээс үзэгч, олон нийтэд үнэ төлбөргүй толилуулна.
Хоёдугаарт, Олон улсын эрдэм шинжилгээний бага хурлыг Монголын үндэсний музейд тавдугаар сарын 12-13-нд зохион байгуулна. Уг хуралд:
Монгол Улс:
- Др. Равдангийн Болд- Онц бөгөөд бүрэн эрхэт Элчин сайд,
- Академич Цэдэндамбын Батбаяр- Латтимор судлалын нийгэмлэг,
- Др. Оохнойн Батсайхан- Төрийн соёрхолт түүхч,
АНУ:
- Проф. Кристофер Этвүүд – Пенсильванийн их сургууль,
- Др. Мягмарын Саруул-Эрдэнэ – АНУ Конгрессийн номын сан,
- Др. Дашдоржийн Дотно- Харвардын их сургууль,
- Анн Латтимор Прис- Оуэн Латтиморын ач охин,
Их Британи:
- Проф. Каролайн Хамфри – Кембрижийн их сургууль,
- Бие даасан судлаач Сью Бёрн,
Япон Улс:
- Проф. Тоба Байгаль- Обирин их сургууль тэргүүтэй дотоод, гадаадын эрдэмтэн судлаачид, Завхан аймгийн төлөөлөл оролцоно.
Гуравдугаарт, тавдугаар сарын 14-18-нд төр, шашны нэрт зүтгэлтэн Дилав хутагт Б.Жамсранжавын төрсөн нутаг Завхан аймагт олон нийтийн арга хэмжээнүүд болно. Энэ үеэр хуралд оролцогч олон улсын эрдэмтэн судлаачид, төслийн оролцогч талуудын төлөөлөл Завхан аймагт ажиллаж, олон нийтийн лекц, уулзалт хэлэлцүүлэг, танин мэдэхүйн цогц арга хэмжээ зохион байгуулж, олон улсын үзэсгэлэнгийн бичил хувилбарыг гаргаж, нутгийн зон олонд толилуулах ажээ.
Арга хэмжээг хамтран зохион байгуулагчид:
- Монголын Үндэсний музей / National Museum of Mongolia
- Монгол Улсын Үндэсний номын сан /National Library of Mongolia/
- Завхан аймгийн Засаг даргын Тамгын газар
- U.S. Embassy - Ulaanbaatar, Mongolia
- MNB Монголын Мэдээ
- МОНЦАМЭ агентлаг
Архивын баримт судлагааг дэмжигч байгууллагууд:
- Үндэсний Архивын Ерөнхий газар
- Тагнуулын ерөнхий газрын тусгай архив
- Конгрессын номын сан
- Жонс Хопкинсын их сургууль
- Пенсильванийн их сургууль
- Харвардын их сургууль
Дилав хутагт сангаас Америк дахь Монгол судлалын төвтэй хамтран хэрэгжүүлж буй “Хутагт Латтимор хоёр: Тив дамнасан өв” төслийн нээлт Америкийн Нэгдсэн Улсын тусгаар тогтнолын 250 жилийн ой, Монгол-Америкийн дипломат харилцаа үүсэж хөгжсөний 40 жилийн ойг угтан гарч буй бөгөөд зохион байгуулагчид үзэсгэлэнг тус баяруудаар хамтран толилуулахаар төлөвлөж байгаа юм байна.
Эх сурвалж: МОНЦАМЭ Агентлаг Ш.Батболд
