Элсэлтийн шалгалтад 49 мянган шалгуулагчаас 194 нь 800 оноо авчээ

Улаанбаатар, 2026 оны зургаадугаар сарын 29 /МОНЦАМЭ/. Монгол Улсын хэмжээнд өнгөрсөн өдрүүдэд орон Элсэлтийн шалгалтыг даяар зохион байгуулж дууссантай холбогдуулан Боловсролын яам, Боловсролын үнэлгээний төв хамтран дүн, оноотой холбоотой мэдээлэл өглөө.

Хурлын эхэнд Боловсролын яамны Ерөнхий боловсролын бодлого зохицуулалтын газрын дарга Л.Ганбат “Элсэлтийн шалгалтыг энэ жил ноцтой зөрчилгүй зохион байгууллаа. Нийт 49 мянган шалгуулагч бүртгүүлснээс математикийн хичээлээр бүртгүүлсэн 33.116 сурагчийн 94 хувь нь шалгалтад хамрагдсан. Хичээлүүдийн ирцийг харьцуулахад нийгэм судлал хамгийн өндөр, харин орос хэл, түүхийн хичээл хамгийн бага байлаа. Энэ нь шалгуулагчид 10 хүртэлх хичээлээс өөрийн сонголтоор бүртгүүлдэг бөгөөд бүртгүүлсэн бүх шалгалтад заавал оролцох үүрэггүй. Шалгалтын анхны оноог шалгалт дуусмагц шалгуулагч бүрд танилцуулж, дараа нь тусгай аргачлалаар хэмжээст оноонд шилжүүлэн 200-800 онооны үнэлгээг тооцдог. Элсэлтийн шалгалт нь шалгуулагчдыг эрэмбэлэх зорилготой уралдаант шалгалт учраас эцсийн дүнгээр нь жагсаадаг. Сүүлийн дөрвөн жилээс олон улсын шалгалтын дүнг элсэлтийн шалгалтын оноотой дүйцүүлдэг болсон бөгөөд энэ жил 6032 шалгуулагч олон улсын шалгалтын оноогоо дүйцүүлсэн. Өмнө нь ийм хүсэлтийг ихэвчлэн хувийн сургуулийн сурагчид гаргадаг байсан бол өнгөрсөн жилээс эхлэн улсын сургуулийн төгсөгчдийн эзлэх хувь 80 орчим хувьд хүрсэн нь олон улсын шалгалтыг зөвхөн олон улсын хөтөлбөрөөр суралцсан хүүхдүүд өгдөггүйг харуулж байна” хэмээн ярилаа.

Энэ жил 10 хичээлээр шалгалт зохион байгуулахад 194 шалгуулагч 800 оноо авсан нь өнгөрсөн оныхоос 31-ээр өсжээ. Мөн шалгуулагчдын тоо өмнөх хоёр жилийнхтэй харьцуулахад нэмэгдсэн байна. Шалгуулагчид дүнтэйгээ санал нийлэхгүй бол энэ долоо хоногтоо багтаан хариултын материалаа тулган шалгуулах боломжтой аж. Элсэлтийн шалгалтын үеэр улсын хэмжээнд 22 шалгуулагч гар утас авч орсныг журмын зөрчилд тооцож, тэдний шалгалтын дүнг хүчингүй болгосон байна.

Ташрамд дурдахад, Боловсролын үнэлгээний төвөөс жилд хоёр удаа Элсэлтийн шалгалт явуулдаг. Тэгвэл дараагийн элсэлтийн шалгалтыг 11 дүгээр сард монгол хэлээр эхлүүлж, арванхоёрдугаар сард бусдыг нь зохион байгуулахаар төлөвлөжээ.

Эх сурвалж: МОНЦАМЭ Агентлаг Б.Мөнхзул