.png){kind=logo}
Олон ястны өлгий нутаг хэмээгддэг Ховд аймагт насанд хүрэгчдийн 2023 оны шатрын улсын аварга шалгаруулах шатрын тэмцээн 5 дугаар сарын 19-31-ний хооронд болж шилдгүүдээ шалгаруулна.
Олон угсаатны өлгий нутаг, Баруун бүсийн тулгуур төв Ховд аймгийн Ховд хотноо Ховд аймгийн Засаг дарга Э.Болормаагийн ивээл дор зохион байгуулагдах насанд хүрэгчдийн Монгол улсын аварга шалгаруулах шигшээ тэмцээний бэлтгэл ажлыг хангах хүрээнд Ховд аймгийн шатрын холбооны тэргүүн Б.Балдорж, Ховд аймгийн шатрын холбооны удирдах зөвлөлийн гишүүн Д.Баасандорж нар нийслэл Улаанбаатар хотод ажиллажээ.
Монгол улсын аварга шалгаруулах шигшээ тэмцээний зохион байгуулах хорооны дэд дарга, Монголын шатрын холбооны Тэргүүн дэд ерөнхийлөгч Б.Наранбаатар Ховд аймгийн шатрын холбооны удирдлагуудын хамт Ховд аймгаас сонгогдсон УИХ-ын гишүүдтэй уулзаж тэмцээний бэлтгэл ажлын талаар танилцуулсаны үндсэн дээр УИХ-ын гишүүн,Засгийн газрын гишүүн,Зам тээвэр хөгжлийн сайд С.Бямбацогт, УИХ-ын гишүүн Б.Пүрэвдож нараас дэмжлэг авч хамтран ажиллахаар боллоо.
Мөн Олимп,нийтийн биеийн тамир спортын Үндэсний хорооны ажлын албаны албаны дарга Э.Тэмүүжинд Улсын аварга шалгаруулах шигшээ тэмцээний зохион байгуулах хорооны дарга, Ховд аймгийн Засаг дарга Э.Болормаагийн хамтран ажиллах албан бичгийг хүргүүлэн тэмцээний бэлтгэл ажлын талаар мэдээлэл өгч бүх талаар хамтран ажиллахаар болсон байна.
