.png){kind=logo}
Японы мэргэжлийн сумо бөхийн Токио хотноо үргэлжилж байгаа тавдугаар сарын Нацү башёгийн 11 дэх өдрийн /2023.05.24/ барилдааны тоймыг та бүхэнд танилцуулж байна.
Их аварга Тэрүнофүжи Г.Ган-Эрдэнэ, 11 дэх өдрийн барилдаанд Сэкиваке Хошёорюү С.Бямбасүрэнтэй хүч үзэж түүнийг кимэдаши мэхээр хаяснаар 10 даваа, 1 унаатай башёг тэргүүлж байна.
Энэ өдөр Сэкиваке Кирибаяама Б.Лхагвасүрэн, Хирадоүми /М-9/-тэй таарч барилдан түүнийг ёрикири мэхээр давж, 9 даваа, 2 унаатай башёг үргэлжлүүлж байна.
Тамаваши Б.Мөнх-Оргил /М-7/, Ичияамамото /М-15/-той учраа таарч барилдан, түүнийг ошидаши мэхээр давснаар 5 даваа, 6 унаатай болоод байгаа аж.
Чиёошома Г.Мөнхсайхан /М-13/ энэ өдөр Таканошо /М-8/-той барилдаж түүнд ошидаши мэхээр унаж 6 даваа, 5 унаатай башёг үргэлжлүүлж байна.
Миторюү М.Төрболд /М-16/, энэ өдөр Дайшохо Ч.Шижирбаяр/М-11/-тай учраа тааран барилдаж түүнд ёрикири мэхээр ойчиж 4 даваа, 7 унаатай байгаа бол Дайшохо 5 даваа, 6 унаатай башёг үргэлжлүүлж байна.
Харин дээд зиндаанд 2 дахь удаагаа дэвшин барилдаж байгаа Хокүсейхо Э.Даваанинж /М-11/, Сэкиваке Вакамотохару-тай учраа таарч түүнд үтчари мэхээр унаснаар, тэд адил 8 даваа, 3 унаатай башёг үргэлжлүүлж явна.
Энэ өдөр Асанояама /М-14/, Мэйсей /М-6/-тэй хүч үзэж түүнийг цүкиотоши мэхээр давснаар 10 даваа, 1 унаатай Нацү башёг 73 дахь Их аваргын хамт тэргүүлсээр байна.
