.png){kind=logo}
"Ховд - 2023" Шатрын насанд хүрэгчдийн Монгол Улсын аварга шалгаруулах шигшээ тэмцээний шилдгүүд болох "Монгол Улсын аваргууд" тодорлоо.
Ховд аймгийн Засаг дарга Э.Болормаагийн ивээл дор зохион байгуулагдсан "Ховд-2023" шатрын насанд хүрэгчдийн Монгол улсын аварга шалгаруулах эрэгтэйчүүдийн 61, эмэгтэйчүүдийн 53 дахь удаагийн шигшээ тэмцээн Ховд аймгийн Ховд хотноо 2023 оны 5 дугаар сарын 19-30-ны өдрүүдэд амжилттай зохион байгуулагдаж өндөрлөлөө.
Хагас шигшээ шатнаас шалгарсан шилдэг 24 тамирчин Нээлттэй, эмэгтэй ангилалд 12 хоногийн турш шударга сайхан өрсөлдөж дүнгээ гаргалаа.
НЭЭЛТТЭЙ АНГИЛАЛ:
Тэргүүн байр: "Элит брейн" академийн тамирчин Дэлхийн шатрын холбооны мастер М.Амилал
Дэд байр: Өвөрхангай аймаг, "Их заргач" клубын дасгалжуулагч Их мастер Г.Мөнхгал
Гутгаар байр: Ховд аймаг, "Гэгээн арвай" клубын тамирчин Олон Улсын мастер С.Ган-Эрдэнэ
Шагналт 4-р байр: Завхан аймаг, "Гэгээн арвай"клубын тамирчин олон улсын мастер Г.Амартүвшин
Шагналт 5-р байр: Ховд аймаг, олон улсын хэмжээний мастер С.Чингүүн
ЭМЭГТЭЙ АНГИЛАЛ:
Тэргүүн байр: Төв аймаг, "Хан -Алтай" клуб,52-р сургуулийн тамирчин спортын дэд мастер Э.Хүслэн
Дэд байр: "Говь-Алтай" аймаг, "Босоо ноён" клубын Дэлхийн шатрын холбооны дэд мастер Х.Баясгалан
Гутгаар байр: Завхан аймаг, "Гэгээн Арвай" клубын тамирчин Дэлхийн шатрын холбооны дэд мастер Б.Энхсаран
Шагналт 4-р байр: Орхон аймаг, "Хангарьд" клубын тамирчин Дэлхийн шатрын холбооны дэд мастер Б.Мөнгөнзул
Шагналт 5-р байр: Өмнөговь аймаг, "Стейниц " Монголын шатрын академи, 31-р сургуулийн тамирчин спортын дэд мастер Э.Энхрий нар тус тус шалгарлаа.
Энэхүү тэмцээний үеэр Монголын үндэсний олимпын хороо /МҮОХ/-ны болон БТСУХ-ны шагналуудыг Ховд аймагт шатрын спортыг хөгжүүлэхээр зорьж байгаа эрхмүүдэд олголоо.
Тэмцээний хаалтын ажиллагааны үеэр Ховд нутгаас төрөн гарсан шатрын спортын мастеруудад Ховд аймгийн засаг даргын тамгын газар, Ховд аймгийн иргэдийн төлөөлөгчдийн хурал, Ховд аймгийн Зэрэг сумын удирдлагууд хүндэтгэл үзүүллээ.
2023 оны насанд хүрэгчдийн улсын аварга шалгаруулах шигшээ тэмцээнийг нутагтаа хүлээн авч өндөр хэмжээнд зохион байгуулсан Баруун бүсийн тулгуур төв Ховд аймгийн засаг дарга Э.Болормаа болон Ховд аймгийн засаг даргын тамгын газар, Ховд аймгийн иргэдийн төлөөлөгчдийн хурлын хамт олон шатрын спортыг гүнээ дээдэлдэг Ховд сайхан нутгийн зон олонд МШХ-ноос талархал илэрхийлж амжилт хүслээ.
Мөн зохион байгуулагч менежерийн ур чадвараа харуулж, жишиг тогтоосон өндөр зэрэглэлийн тэмцээн зохион байгуулсан Монголын шатрын холбооны тэргүүн дэд ерөнхийлөгч Б.Наранбаатарт онцгойлон талархал илэрхийлэв.
Тэмцээний арын албанд хариуцлагатай ажилласан Олон улсын шилэгдмэл шүүгч Г.Алтан-очоор удирдуулсан шүүгчдийн багтаа болон ачааны хүндийг үүрч хамтарч ажилласан Б.Балдорж тэргүүнтэй Ховд аймгийн шатрын холбооны хүчирхэг залуусдаа ажлын өндөр амжилт хүсэв.
Ховд аймгийн Ховд хотноо зохиогдож буй "2023 оны шатрын насанд хүрэгчдийн улсын аварга шалгаруулах эмэгтэйчүүдийн 53 дахь удаагийн шигшээ тэмцээн"-д шинэ залуу аварга төрлөө.
Төв аймаг, "Хан-Алтай" клуб, 52 дугаар сургуулийн тамирчин спортын дэд мастер Эрдэнэбаярын Хүслэн 15 нас 4 сартайдаа Монгол Улсын 26 дахь аварга шатарчнаар тодорлоо.
11-р тойргийн тоглолтод дэд мастер Э.Хүслэн хар өнгөөр наадаж Б.Амин-Эрдэнийн эсрэг хожил байгуулж, 11 өргөөс 7.5 хожилтой коэффицентийн давуугаар Монгол Улсын аварга цол хүртсэн байна.
