"Осло-2021” ДАШТ-ий хүрэл медальт, өсвөр үе, 23 хүртэлх насны Азийн аварга, “Хүч” спорт хорооны тамирчин ОУХМ Төмөр-Очирын Тулга Бишкекийн дэлхийн чансааны оноо олгох тэмцээний сүүлийн өдөр 65 кг жинд алтан медаль хүртэж төрийн дууллаа эгшиглүүлэв.

Тэрбээр Бишкект 1/8 шигшээд Тажикистаны дагестан легионер Абдулмажид Кудиевийг 4:0-ээр, шөвгийн наймд Узбекистаны Уможон Жалоловыг 6:5-аар, хагас шигшээд Казахстаны Мейржин Ашировыг 8:4-ээр, финалд 2021 оны Ослогийн ДАШТ-д хүрэл медалийн тавцанд зэрэгцэн зогсч байсан эзэн орны Алибек Осмоновыг 5:2-оор тус тус ялж алтан медалийн тавцанд зогсов.

Т.Тулгын хувьд “Ranking Series” ангиллын тэмцээнээс гурав дахиа алтан медалиа зүүж байгаа бөгөөд 2022 оны зургадугаар сард Алматыд Болат Турлыханов, энэ жилийн хоёрдугаар сард Хорватад "Загреб Опен"-д түрүүлээд байсан юм

Дэлхийн бөхийн холбоо (UWW)-ны чансааны оноо олгох энэ жилийн 3 дахь цуврал тэмцээн өнгөрсөн долоо хоногийн сүүлээр буюу зургадугаар 1-4-ны өдрүүдэд Кыргызстаны нийслэл Бишкект боллоо. Бишкекийн дэвжээнд бөхийн гурван төрөлд 29 орны 400 гаруй тамирчин оролцсон байна. Монгол Улсаас эрэгтэй 11, эмэгтэй 8 бөх Кыргызстанд барилдсан юм.

П.ОРХОН, Э.ДЭЛГЭРМАА НАР МӨНГӨ, С.ЦЭРЭНЧИМЭД ХҮРЭЛ МЕДАЛЬ ЗҮҮВ

Бишкект болж буй Каба Уулу Кожомкул болон Раатбек Санатбаевын нэрэмжит дэлхийн чансааны оноо олгох энэ жилийн гурав дахь цуврал тэмцээний эмэгтэйчүүдийн 62 кг жинд "Алдар" спорт хорооны хоёр бүсгүй болох дэлхийн болон Азийн аварга, гавьяат тамирчин Пүрэвдоржийн Орхон мөнгө, ДАШТ-ий алт, мөнгөн медальт, гавьяат тамирчин Сүхээгийн Цэрэнчимэд хүрэл медаль хүртэв.

П.Орхон Бишкекийн дэвжээнд финалд U23 насны ДАШТ-ий 2 мөнгөн медальт, Европын хошой аварга Украины Илона Прокопевниукт 3:8-аар ялагдсан бол С.Цэрэнчимэд хүрэл медалийн төлөөх барилдаанд ЕАШТ-ий мөнгө, хүрэл медальт Германы Луиза Хелга Нимешийг 8:3-аар ялсан.

Харин 68 кг жинд Азийн АШТ-ий 1 мөнгө, 2 хүрэл медальт, үндэсний шигшээ баг, "Хүч" спорт хорооны тамирчин ОУХМ Энхсайханы Дэлгэрмаа Бишкект мөнгөн медалийн эзэн болов. Э.Дэлгэрмаа үдээс өмнө тэгшитгэлд Узбекистаны Светлана Окназароваг 11:0-ээр цэвэр, шөвгийн наймд Канадын Оливиа Ди Бакког 6:1-ээр, хагас шигшээд "Токио-2020" олимпийн хүрэл медальт, "Осло-2021" дэлхийн аварга эзэн орны Мээрим Жуманазароваг 2:1-ээр тус тус ялсан. Харин шигшээ барилдаанд ДАШТ-ий мөнгө, хүрэл медальт, Азийн хошой аварга БНХАУ-ын Зоу Фенгэд 5:14-өөр ялагдав.

Ийнхүү энэ өдөр хүч үзсэн манай 3 бүсгүй гурвуулаа (2 мөнгө, 1 хүрэл) медаль хүртсэн.

БИШКЕКТ 53 КГ ЖИНД МОНГОЛЫН ХОЁР БҮСГҮЙ ХООРОНДОО ФИНАЛДАВ

Каба Уулу Кожомкул болон Раатбек Санатбаевын нэрэмжит дэлхийн чансааны оноо олгох тэмцээн Кыргызстаны нийслэл Бишкект гурав дахь өдрөө үргэлжилж байна. Өнөөдөр үдээс өмнө чөлөөт бөхийн эрэгтэйчүүдийн 97, 125, эмэгтэйчүүдийн 50, 53, 55, 59, 65, 72 кг жингийн барилдаанууд болж манай 6 бөх хүч үзсэн. Эмэгтэйчүүдийн 53 кг жинд “Белград-2022” ДАШТ-ий мөнгөн медальт ОУХМ Батхуягийн Хулан, “Улаанбаатар-2022” Азийн АШТ-ий мөнгөн медальт ОУХМ Ганбаатарын Отгонжаргал нар хоорондоо финалдаж гавьяат тамирчин Бат-Очирын Болортуяа хүрэл медалийн төлөө барилдахаар болов.

Б.Хулан хагас шигшээд Эквадорын Лусия Йепез Гузманыг, Г.Отгонжаргал нутаг нэгт Б.Болортуяаг тус тус цэвэр дарсан. Харин 65 кг-д ОУХМ Ө.Пүрэвсүрэн 1 ялж, 2 ялагдаад байгаа бөгөөд үдээс хойш сүүлийн тойргийн барилдаанаа хийнэ. Харин 97 кг-д ОУХМ Ө.Батзул Энэтхэгийн Деепакт 7:9-өөр, 125 кг-д гавьяат тамирчин М.Лхагвагэрэл БНХАУ-ын Бөх-Эрдэнэд 4:4-өөр ялагдснаар тэмцээнээ өндөрлүүлэв.

МАНАЙ ГУРВАН БҮСГҮЙ БИШКЕКТ 53 КГ ЖИНГИЙН МЕДАЛИЙН ТАВЦАНД ЗОГСОВ

Кыргызстаны Бишкек хотод болж буй Каба Уулу Кожомкул болон Раатбек Санатбаевын нэрэмжит дэлхийн чансааны оноо олгох тэмцээний гурав дахь өдөр эмэгтэйчүүдийн 53 кг-ын жинд Монголын гурван бүсгүй иж бүрэн медаль хүртэж шагналын тавцанд зэрэгцэн зогсов. Тодруулбал, “Белград-2022” ДАШТ-ий мөнгөн медальт ОУХМ Батхуягийн Хулан алт, “Улаанбаатар-2023” Азийн АШТ-ий мөнгөн медальт ОУХМ Ганбаатарын Отгонжаргал мөнгө, олимп, ДАШТ-ий хүрэл медальт гавьяат тамирчин Бат-Очирын Болортуяа хүрэл медалиар энгэрээ мялаасан.

53 кг жинд 13 бөх барилдсан бөгөөд финалд шалгарсан монгол бүсгүйчүүдийн дуэльд Б.Хулан 8:0-ээр ялсан бол Б.Болортуяа хүрлийн төлөөх барилдаанд БНХАУ-ын Жян Мей-инийг цэвэр дарав.