.png){kind=logo}
"Улаанбаатар-2023" жүдо бөхийн Их дуулга тэмцээний хоёр дахь өдөр энэхүү тэмцээний индрээс тэмцээнд оролцогч нийт баг тамирчид болон зочид, төлөөлөгчдөд хандан Монгол Улсын Ерөнхийлөгчийн мэндчилгээг ЕТГ-ын дарга Я.Содбаатар уншиж танилцуулан, амжилт хүсэж, баяр хүргэн, талархал илэрхийллээ.
/Монгол Улсын Ерөнхийлөгчийн мэндчилгээг бүрэн эхээр танилцуулж байна./
Эрхэм хүндэт Олон Улсын Жүдо Бөхийн Холбооны Ерөнхийлөгч Мариус Визер,
Эрхэм хүндэт тамирчид, дасгалжуулагчид, шүүгчид ээ!
Эрхэм хүндэт зочид төлөөлөгчид, жүдо бөхийг сонирхогчид, үнэнч хөгжөөн дэмжигчид ээ!
Та бүхэнд энэ өдрийн мэндийг өргөн дэвшүүлье.
Бүгд найрамдах Франц Улсын нийслэл Парис хотод 2024 онд болох хүн төрөлхтний эв нэгдлийн бэлгэдэл зуны олимпын 33 дугаар наадмын жүдо бөхийн албан ёсны анхны оноог олгож эхэлсэн "Улаанбаатар-2023" Их дуулга тэмцээн Монгол Улсын нийслэл Улаанбаатар хотод хоёр дахь удаагаа зохион байгуулагдаж, Та бүхэнтэй дахин учран золгож байгаадаа баяртай байна.
Манай улс 2009-2012 онуудад "Дэлхийн цом", 2013-2016 онуудад "Гран При", тэмцээнийг тус тус зохион байгуулж, улмаар 2022-2025 онуудад зэрэглэл ахиж "Их дуулга" тэмцээнийг зохион байгуулахаар болсон.
Монгол Улсын Ерөнхийлөгчийн ивээл дор 2022 онд анх удаа зохион байгуулагдсан өндөр зэрэглэлийн тус тэмцээнд 30 орны 255 тамирчин хурд хүч, авхаалж самбаагаа сорин өрсөлдсөн бол энэ удаад 47 орны 350 гаруй тамирчин оролцохоор болж, жилээс жилд өргөжин хөгжиж байгаад сэтгэл хангалуун байна.
Их дуулга тэмцээн Улаанбаатар хотод зохион байгуулснаар дэлхийн шилдэг тамирчидтай өрсөлдөж ур чадвараа дээшлүүлэх олон улсад эх орноо суртчилах, хүүхэд залуусын жүдо бөхөөр хичээллэх дур сонирхлыг нэмэгдүүлэх зэрэг олон талын ач холбогдолтой юм. Бид дэлхийн олон оронтой найрсаг харилцаагаа өргөжүүлэн хөгжүүлэхдээ спортын бүх төрлийн үйл ажиллагаа, уралдаан тэмцээн, наадмыг идэвхтэй дэмжсээр ирсэн бөгөөд цаашид ч дэмжих болно.
Манай ард түмэн эрт үеэс хүчит бөхчүүдээ дээдлэн хүндэлж, монгол бөхийн барилдаанаа эрийн гурван наадмын нэг гол төрөл хэмээн эрхэмлэж ирсэн нандин уламжлалтай. Тийм ч учраас дэлхийн спортын тавцанд үзүүлсэн, монголчууд бидний анхдагч, бас оргил амжилтууд бөхийн төрлүүдтэй холбогддог. Өрсөлдөгчид маань ч Монгол орныг бөхийн орон хэмээн зүй ёсоор хүлээн зөвшөөрдөг билээ.
Дэлхийн бөхийн төрлүүд дундаас манай ард түмэн хүндлэл ёс суртахууны үлгэрлэл, хурд хүчний гайхамшиг болсон жүдо бөхийн барилдааныг шимтэн үзэх дуртай.
Биеийн тамир, спортоор дамжуулан хүн төрөлхтөн хоорондоо нөхөрлөл, найрсаг харилцаа, харилцан ойлголцлыг бий болгож, батжуулан бэхжүүлдэг соёл тогтжээ. Биеийн тамир, спорт бол андлал нөхөрлөлийн түлхүүр гэж би боддог. Дайн дажин, өвчин зовлонгүй байж, бие биедээ харилцан зочилж, хамтаар хөгжин дэвших нь бид бүгдийн хүсэл зорилго мөн.
Их спортоор дамжуулан эв нэгдэл, энх тайвныг сурталчлах, олимпизмыг дэлгэрүүлэх үйлс өргөжин хөгжинө гэдэгт итгэлтэй байна.
"Улаанбаатар Их дуулга" тэмцээнийг манай улсад хоёр дахь удаагаа зохион байгуулахаар шийдэж, хүлээлгэсэн итгэлээ бататгаж байгаад Олон Улсын Жүдо Бөхийн Холбоонд гүн талархал илэрхийлье.
Та бүхэн Их эзэн Чингис хааны өлгийн нутаг, мөнх хөх тэнгэрийн орон Монгол Улсад тавтай морилно уу.
Монгол Улсын Ерөнхийлөгч Ухнаагийн Хүрэлсүх
