МҮОХ-ны Тэргүүн дэд ерөнхийлөгч, “Улаанбаатар-2023” Зүүн Азийн залуучуудын наадамд оролцсон Монгол Улсын баг тамирчдын ахлагч Ч.Наранбаатартай уулзаж тус наадмын зохион байгуулалт, ач холбогдлын талаар ярилцсан юм.

-Монгол Улс анх удаагаа эх орондоо спортын томоохон наадам амжилттай зохион байгууллаа. Та энэхүү “Улаанбаатар-2023” Зүүн Азийн залуучуудын наадамд оролцсон Монгол Улсын баг тамирчдын ахлагчийн хувиар сэтгэгдлээ хуваалцана уу?

-Манай улсын хувьд үнэхээр түүхэн үйл явдал болж байна. Бид анх удаагаа "Улаанбаатар 2023" Зүүн Азийн залуучуудын наадмыг эх орондоо зохион байгуулж тус бүс нутгийн 7 Үндэсний олимпын хорооны 800 гаруй тамирчин 11 спортын 12 төрлөөр өрсөлдлөө. Монголын өсвөр залуу үеийнхэн эх орондоо спортоор дэлхийд тэргүүлэгч орнуудын тоонд зүй ёсоор ордог Зүүн Азийн БНХАУ, Япон, БНСУ зэрэг 7 орны шилдэг залуу тамирчидтай өрсөлдөж, харилцан суралцаж, нөхөрлөсөн гэдгээрээ маш өндөр ач холбогдолтой байлаа.

Энэ наадамд хурд, хүч, авхаалж самбаагаа сорьсон залуу тамирчдаас ирээдүйн олимп, дэлхийн олон аварга, шилдэг тамирчид тодрон гарна гэдэгт итгэл дүүрэн байна. Монголын өсвөр үеийнхэн, баг тамирчид нийслэл хотдоо зохион байгуулсан энэ наадмаас их зүйлийг мэдэж, суралцлаа.

Түүнчлэн Монголд багийн спорт эрчимтэй хөгжиж байгааг “Улаанбаатар 2023” наадмын тэмцээн, уралдаанд өрсөлдсөн манай залуу тамирчид гаргасан амжилтаараа нотоллоо. Тухайлбал, 3х3 сагсанбөмбөг, хөлбөмбөг, волейбол, 5х5 сагсанбөмбөгийн төрлүүдэд манай баг тамирчид өндөр ур чадвартай тоглож түүхэн амжилтыг тогтоолоо. Тэд Монголын олон мянган хүүхэд, залуусыг спортоор хичээллэх хүсэл тэмүүлэл, урам зоригийг бадраалаа.

-Олон байгууллага, компани, хүмүүсийн тууштай дэмжлэг туслалцаа, хүч хөдөлмөр, сэтгэл зүтгэлээр монголчууд энэ наадмыг амжилттай зохион байгууллаа. Цаашдаа ч олон том наадмыг эх орондоо зохион байгуулах болов уу?

-Тийм шүү. Монгол Улсын нийслэл Улаанбаатар хотноо 8 дугаар сарын 16-23-нд зохион явуулсан Зүүн Азийн залуучуудын наадмыг амжилттай зохион байгуулахад Улаанбаатар хотын Захирагч Д.Сумъяабазар, “Улаанбаатар Зүүн Азийн залуучуудын наадмын зохион байгуулах хороо”-ны дэд дарга, Нийслэлийн Засаг даргын орлогч З.Төмөртөмөө тэргүүтэй НЗДТГ-ын хамт олон, “Улаанбаатар-2023” Зүүн Азийн залуучуудын наадмын зохион байгуулах хороо ХК-ийн гүйцэтгэх захирал П.Буяндэлгэр тэргүүтэй хамт олон, Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ тэргүүтэй хамт олон, МҮОХ, БТСУХ зэрэг олон байгууллага, хүмүүсийн хамтын хөдөлмөр, зүтгэл шингэсэн гэж болно.

Мөн Зүүн Азийн залуучуудын наадмын 1200 гаруй сайн дурын ажилтан залуус энэхүү наадмыг амжилттай явагдах нөхцлийг бий болгосон бөгөөд хүсэл эрмэлзлэл дүүрэн энэ хөвгүүд, охиддоо чин сэтгэлийн талархал илэрхийлж байна.

-Олон улсын хэмжээний ийм том наадмыг анх удаа зохион байгуулсан болохоор бэрхшээлтэй асуудал бас тохиолдсон л байх, цаашид анхаарах зүйлс байв уу?

Цаг агаарын байдлаас болж “Улаанбаатар-2023” наадмын албан ёсны нээлт 24 цагаар хойшилж 2023 оны 8 дугаар сарын 17-ны 20 цаг 23 минутад эхэлсэн.

Зүүн Азийн олимпын хороо нь 9 үндэсний олимпын хороог нэгтгэдэг. Улаанбаатар хот энэ наадмыг зохион байгуулснаар цаашдаа тив, дэлхийн хэмжээний наадмуудыг эх орондоо зохион явуулах туршлага хуримтлуулж, их спортын ертөнцөд дараа дараагийн томоохон наадмуудыг хүлээж авах эхний үүд хаалгаа нээлээ.

Бид эх орноо, нийслэл хотоо спортоор дамжуулж дэлхийн улс орнуудад сурталчилж чадлаа. Түүнчлэн Улаанбаатарын наадамд оролцсон залуу тамирчид ирээдүйн тив дэлхий, олимпын аваргууд болох амжилтын гараагаа эхлүүлж, Монголын болон бүс нутгийн спортын түүхэнд тодоор бичигдлээ.

-“Улаанбаатар 2023” Зүүн Азийн залуучуудын наадмын зохион байгуулалтын талаар ямар үнэлгээ өгч байгаа бол?

Зүүн Азийн залуучуудын наадам спортын үндсэн 9-10 төрөлтэй байдаг. Харин наадам зохион байгуулах орон 2-3 спортыг санал болгох боломжийг олгодог. Манай улсын хувьд электрон спорт, чөлөөт бөх, боксын төрлийг санал болгосныг Зүүн Азийн олимпын хороодын зөвлөл дэмжсэн юм.

Мөн дүрмийн дагуу наадам зохион байгуулах улсын ҮОХ-ны тэргүүн Зүүн Азийн олимпын хороодын дэд ерөнхийлөгч байдаг. Иймд ЗАОХЗ-ийн хурлаар МҮОХ-ны ерөнхийлөгч Б.Баттүшигийг Зүүн Азийн олимпын хороодын дэд ерөнхийлөгчөөр, МҮОХ-ны Тэргүүн дэд ерөнхийлөгчийн хувьд намайг Зүүн Азийн олимпын хороодын зөвлөлийн гишүүнээр сонгосон. “Улаанбаатар-2023” наадмын бэлтгэл ажил бүрэн хангагдаж, анх удаагаа томоохон наадмыг амжилттай зохион байгуулж байгааг Зүүн Азийн олимпын хороодын зөвлөлөөс сайн үнэлэлт өгсөн.

Сүхбаатарын талбайд болсон наадмын хаалтын ёслолд оролцож үг хэлсэн Зүүн Азийн олимпын хорооны Ерөнхий нарийн бичгийн дарга Вэй Дайшун: “ Энэ наадам Зүүн Азийн улс орон, бүс нутгийн залуучуудын спортод улам хайртай болох сэдлийг бадраалаа. Монгол Улс спортын томоохон тэмцээн, уралдаан зохион байгуулах урт замдаа сайхан эхлэл тавилаа. Монгол Улсын Засгийн газар, Улаанбаатар хотын захиргаа, спортын нийгэмлэгүүдэд онцгойлон талархал илэрхийлье хэмээн онцолсон.

Оролцогч улс орнуудын баг тамирчид, албаны төлөөлөгчид сэтгэл хангалуун байсныг наадмын хаалтын ёслолын үеэр орон орны оролцогчид баяр хөөр дүүрэн байгаа нь тод илэрхийллээ.