.png){kind=logo}
Ханжоу хот. /burged61.mn/ "Ханжоу-2022" Азийн 19 дүгээр наадам БНХАУ-ын Ханжоу хотноо "HangZhou Sports Centre Stadium" цэнгэлдэхэд 2023 оны 9 дүгээр сарын 23-ны үдэш 20.00 цагт нээлтийн ёслол болж, албан ёсоор хөшгөө нээлээ.
Эртний түүхт хятадын ард түмний түүх, соёл урлагийг орчин үеийн технологийн дэвшилтэй хослуулан харуулсан нээлтийн ёслол цэнгэлдэх хүрээлэн дэх 80 мянган үзэгчдийг төдийгүй телевизийн шууд дамжуулалтаар үзэж буй орон орны олон сая үзэгчдийн сэтгэлийг догдлуулсан гайхалтай тоглолт үзүүлбэрүүд байлаа.
Азийн олимпын зөвлөлийн /OCA/ тэргүүний үүрэг гүйцэтгэгч Ража Рандхир Сингх нээлтийн ёслолын үеэр хэлсэн үгэндээ, Ханжоугийн Азийн наадмыг зохион байгуулах хороо /HAGOC/-ноос тивийн спортын хамгийн том наадмыг бэлтгэн зохион байгуулахад оруулсан хүчин зүтгэлийг өндрөөр үнэлж байгаагаа илэрхийлсэн. Тэрбээр “Та бүхэн Азийн наадамд гайхалтай сайн бэлтгэжээ. Цар тахлын улмаас нэг жилээр хойшлогдсон нь OCA-гийн түүхэнд урьд өмнө байгаагүй тохиолдол байсан ч та бүгдийн зүтгэл, зоримог шийдэмгий байдал нь ирэх 16 хоногт үр өгөөжөө өгч, Азийн наадмыг хамгийн гайхамшигтай бөгөөд амжилттай зохион байгуулсан гэх алдарыг хүртэх болно, Баярлалаа. /хятад хэлээр Ши ши гэж хэлэв/ ” хэмээн онцлон тэмдэглэж хэлэхэд цэнгэлдэх дүүрэн үзэгчид уухайлан талархалаа илэрхийлсэн нь нэн сүрлэг байв.
БНХАУ-ын дарга Ши Жиньпин энэхүү нээлтийн ёслолд хүрэлцэн ирж Ази тивийн олимпын наадмыг албан ёсоор нээсэн бөгөөд шар тивийн 45 орны баг тамирчид 16 хоногийн турш хурд, хүч, авхаалж самбаагаа сорин өрсөлдөж шилдгийн шилдгүүдээ тодруулна.
Азийн 19 дүгээр наадмын нээлт Хятадын нарны 24 улирлын нэг болох намрын тэнцлийн өдөр тохиож байгаа юм. Энэ өдөр ургац хураах, дахин нэгдэхийг бэлгэддэг юм байна.
Ийнхүү Азийн наадамд улс орноо төлөөлөн оролцох баг тамирчид цагаан толгойн дарааллаар цэнгэлдэх хүрээлэнд орж ирсэн юм.
Спорт-олимпизмыг дэлхий, тив, улс орон бүрт түгээн дэлгэрүүлэхэд үнэтэй хувь нэмэр оруулж ирсэн үе үеийн олимп, тивийн наадмуудын нэг энэ удаагийн Азийн 19 дүгээр наадамд хамгийн олон хүн ам, газар нутгийг хамруулсан Шар тивийн олимпод Үндэсний 45 олимпын хорооны 12 000 гаруй тамирчид 40 спортын 61 төрлөөр 481 багц медалийн төлөө ур чадвараа сорин өрсөлдөж байгаа гэдгээрээ онцлогтой билээ.
Гэрэл зургийг Харцага
