.png){kind=logo}
“Ханжоу 2022” Азийн Наадмын талбайн теннисийн эмэгтэйчүүдийн ганцаарчилсан төрөлд манай тамирчин Ч.Маралгоо эхний тойрогт Саудын Арабын Яра Алхогбаниг 6:0, 6:1-ээр илүүрхэн хожсон билээ.
Тэрбээр хоёрдугаар тойрогт /2023.09.25/ энэ тэмцээнийг чансаагаар тэргүүлэгч, БНХАУ-ын Чин Вэн Жэнтэй учраа таарч 59 минут өрсөлдөөд 0:6, 0:6-гаар дийлдлээ. Хятадууд нутагтаа зохион байгуулж буй Азийн наадамд их ач холбогдол өгч байгаа нь илгээсэн тамирчдынх нь чансаагаар мэдэж болно.
Тодруулбал, эрэгтэй ганцаарчилсан төрөлд ATP ангиллын тэмцээнд түрүүлсэн анхны хятад теннисчин И Бин Ву өрсөлдөж байгаа.
Харин эмэгтэйчүүдийн ганцаарчилсан төрөлд эзэн орныг төлөөлж буй Чин Вэн Жэн тивдээ төдийгүй дэлхийд өрсөлддөг теннисчин. Өнгөрсөн сард болсон Америкийн Их Дуулга тэмцээний шөвгийн наймд шалгарч, замналынхаа оргил амжилтыг үзүүлсэн 20 настай нанхиад бүсгүй өдгөө дэлхийн чансааны #23-т жагсаж байгаа энэ тамирчинтай Ч.Маралгоо ийнхүү тоглолоо.
Эрэгтэй ганцаарчилсан төрөлд М.Бадрах Вьетнамын шилдэг теннисчин Ли Хоан Намтай учраа таарч, 1:6, 2:6-гаар дийлдлээ. Эмэгтэй хос төрөлд эгч дүүс болох Ч.Маралгоо, Ч.Мартаа нар эхний даваанд Катарын хосод нэг ч оноо алдалгүй, 6:0, 6:0-ээр илүүрхэв. Эгч дүүс дараагийн даваанд энэ тэмцээний чансаагаар 2 дугаарт бичигдэж буй Хятадын Тайпэй багтай өрсөлдөнө.
