.png){kind=logo}
Монголын үндэсний паралимпын хорооны 2023 оны шилдгийн шилдэг шалгаруулах ёслол “Улаанбаатар” зочид буудлын “Баянзүрх” танхимд болж шилдгүүдээ тодруулав.
Улиран одож буй 2023 онд Монгол Улсын пара тамирчид ДАШТ, Азийн наадам, Азийн АШТ, Дэлхийн цом болон гранпри тэмцээн, наадмуудаас нийт 132 (алт 62, мөнгө 43, хүрэл 27) медаль хүртжээ. 2023 оны спортын онцлох үйл явдал болох “Ханжоу-2022” Азийн зуны спортын наадмаас Монголын тамирчид найман медальтай ирсэн бөгөөд одоогийн байдлаар “Парис-2024” зуны паралимпын гурван эрхийг эх орондоо авчирсан байна.
МҮПХ-ны оны шилдгүүдийг танилцуулж байна.
Шилдгийн шилдэг тамирчин: Хөдөлмөрийн баатар, гавьяат тамирчин Э.Содномпилжээ Шилдгийн шилдэг эмэгтэй тамирчин: У.Сүрэнжав
Шилдэг эрэгтэй тамирчин: Гавьяат тамирчин Г.Болор-Эрдэнэ
Шилдэг эмэгтэй тамирчин: Л.Туруунаа
Шилдэг эрэгтэй дасгалжуулагч: Д.Батнасан
Шилдэг эмэгтэй дасгалжуулагч: Б.Нарантуяа
Шилдэг залуу тамирчин: Г.Даваахүү
Шилдэг спортын холбоо: Монголын пара хөнгөн атлетикийн холбоо
Оны онцлох тамирчин: Д.Ганбат
Оны шилдгийн шилдэг тамирчин болсон Э.Содномпилжээ нь 2023 онд пауэрлифтингийн ДАШТ-ээс мөнгө, Дэлхийн цомоос алт, Азийн АШТ-ээс алт, “Ханжоу-2023” Азийн зуны спортын пара наадмаас мөнгө, “Хөгжлийн бэрхшээлтэй тамирчдын дэлхийн наадмаас алтан медаль хүртсэн юм. Тэрбээр МҮПХ-ны оны шилдгийн шилдэг цомыг дөрөв дэх удаагаа хүртэж байгаа бөгөөд өмнө нь 2016, 2018, 2021 онд гардаж байв.
Харин шилдэгийн шилдэг эмэгтэй тамирчин болсон У.Сүрэнжав нь таеквондогийн 2023 оны ДАШТ-ээс хүрэл, “Ханжоу-2022” Азийн пара наадмын мөнгө, Австрали, Франц, Мексикийн Гран при тэмцээнээс алт, мөнгөн медаль хүртсэн юм.
Энэ ёслолын үеэр МҮПХ-ны ерөнхийлөгчийн нэрэмжит шагналыг Монголын тэргэнцэртэй сэлэмний холбооны нарийн бичгийн дарга О.Анударьд олголоо. Түүнийг тэргэнцэртэй иргэдийг багийн спортоор хичээллэх, спортын амжилт гаргахад үнэтэй хувь нэмэр оруулж, тус спортын төрлийг Монголд хөгжүүлэхэд онцгой гавьяа байгуулсан хэмээн онцолж байна.
