.png){kind=logo}
Монголын хөлбөмбөгийн Премьер лигийн өвлийн амралт дуусч, улирлын хоёрдугаар хагас эхлэх мөч ойртоод байна.
Монголын хөлбөмбөгийн холбоо, Хөлбөмбөгийн лигийн зөвлөл, Монголын спортын корпорацитай байгуулсан хамтын ажиллагааны гэрээний хүрээнд Премьер лиг зохион байгуулалтын шинэ түвшинд явагдаж эхлэх бөгөөд лигийн шинэ өнгө төрх, брэндинг, ирэх 6 жилийн стратеги төлөвлөгөөг танилцуулах ёслол мягмар гарагийн үдэш /2024.02.20/ “Централ тауэр” цамхагийн 17 давхарын KRYPTOS ресторанд боллоо.
Ёслолд Монголын хөлбөмбөгийн холбооны удирдлагууд, Премьер лиг, 1 дүгээр лигийн багуудын төлөөлөл болон Франц, Турк улсын Элчин сайдууд оролцов.
Европын хөлбөмбөгийн томоохон лигүүд холбооноосоо тусдаа, бие даасан компанийн байдалтай үйл ажиллагаа явуулдаг жишгийн дагуу Монголын Премьер лиг ХХК албан ёсоор байгуулагдсан бөгөөд уг компанийн Удирдах зөвлөлд лигийн бүх багийн төлөөлөл багтаж байгаа аж. Ингэснээр Премьер лигтэй холбоотой бүхий л шийдвэрт багийн эзэд голлох нөлөөтэй оролцох боломж бүрдээд байна.
Энэхүү ёслолын эхэнд Brainstorm компанийн гүйцэтгэх захирал Б.Одбаяр Премьер лигийн шинэ лого, брэндингийг танилцууллаа. Тус компани сагсанбөмбөгийн дээд лигийн брэндингийг мөн хийсэн бөгөөд энэ удаа гаднын олон лигийн брэндингийг харьцуулан судалсны үндсэн дээр монгол үндэсний онцлогийг агуулсан брэндинг бүтээснээ тайлбарласан юм.
Түүнчлэн Монголын Премьер лигийн гүйцэтгэх захирал Б.Хосбаяр ирэх 6 жилийн стратеги төлөвлөгөө нь үндсэн 5 зорилгод чиглэж буйг танилцуулав.
Тухайлбал:
-Үзэгчдэд чиглэсэн үйлчилгээ, үзэгчдийн сэтгэл ханамж
-Шударга тоглолт
-Шууд дамжуулалт, технологийн шийдлүүд
-Клуб, тамирчдын хөгжил, үйлчилгээ
-Маркетинг, засаглалын шинэчлэл гэсэн 5 чиглэлд түлхүү анхаарч ажиллана гэдгийг онцолж байв.
Тэрбээр Монголын премьер лигийг шинэчлэх 5 үндсэн зорилго, үндсэн зорилго бүр 5 дэд зорилттой, мөн 5 дэд зорилт нь тус бүрдээ 5 зорилттой бөгөөд нийтдээ 125 зорилт бүхий тус стратеги төлөвлөгөөг нэг бүрчлэн товч тайлбарлаж, харилцан санал солилцсон юм.
Эдгээр 5 зорилго нь цаашид клубүүдийг чадавхжуулах, үзэгчдийн тоог нэмэгдүүлэх, шүүлтийг шинэ түвшинд гаргаж, гадаадаас шүүгчид урьж авчрах, шууд дамжуулалтын чанарыг сайжруулах, гадаад харилцааг хөгжүүлэх, шударга өрсөлдөөнийг бий болгох, статистик мэдээллийг тогтмолжуулах, тамирчдыг даатгал, эрүүл мэндийн үзлэгт хамруулах, хөлбөмбөгийн талбайн гадна үзэгч, тамирчдад зориулсан хоолны гудамж байгуулах… зэрэг 125 дэд зорилтод хуваагдаж байгаа аж. Энэ бүх ажлыг ирэх 6 жилд шат дараатай хийж гүйцэтгэнэ гэдгийг энэ үеэр онцоллоо.
Стратеги төлөвлөгөөг танилцуулсны дараа багуудын төлөөллүүд сонирхсон асуултдаа хариулт авах чөлөөт хэлэлцүүлэг өрнүүлсэн юм.
Монголын Премьер лигийн 2 дугаар хагасын тоглолтууд 3 дугаар сарын 1-31-ний хооронд Төв аймагт байрших АИРДОМ бэлтгэлийн талбайд явагдах бөгөөд 4 дүгээр сарын 5-нд гадаа талбайн нээлт болох юм байна.
2023-2024 оны Премьер лигт оролцож буй 10 баг тус бүр одоогоор 9 тоглолт хийгээд байгаа бөгөөд “Булган ФС Фалконс” баг 25 оноогоор хүснэгтийг тэргүүлж, “Дэрэн” клуб 21 оноогоор удаалж байна.
NEW ERA, NEW STRATEGY
#MPL
Ташрамд сонирхуулахад, Монголын Спортын Корпораци нь 2021 оноос эхлэн үйл ажиллагаагаа явуулж байгаа Монголын анхны спортын менежментийн компани юм. Тус компанийн хамт олон спортын салбарын эко системийг хөгжүүлэхээр спортын холбоодтой хамтран ажилладаг бөгөөд, харилцагчдаа өндөр чадамжтайгаар өөрсдийн тодорхой зорилт, бодлогоо хэрэгжүүлэхэд нь түлхэц үзүүлэх зорилготой ажиллаж байгаа юм байна.
