Тайландын Бангкок хотноо "Парис 2024" олимпын эрх олгох боксын сүүлчийн тэмцээн 20245 оны 5 дугаар сарын 24-нд эхэлсэн бөгөөд Монголын 7 эрэгтэй, 5 эмэгтэй тамирчин тус тэмцээнд хүч, ур чадвараа сорихоор тус улсад очоод байгаа билээ.

"Парис 2024" олимпын сүүлчийн эрх олгох тэмцээний талаар Монгол Улсын гавьяат дасгалжуулагч Ц.Нандигжавын бичсэн тойм мэдээлэл, дүгнэлтийг та бүхэндээ толилуулж байна.

БОКС: Парис-24 олимпын эрх олгох сүүлчийн тэмцээний 5 дахь өдөр.

Энэ өдөр шөвгийн 16-д үлдэхийн төлөө манай 4 тамирчин рингэнд гарч тулалдах ёстой байсан МУГТ, дэлхийн аваргын хүрэл медальт, Азийн наадмын аварга, Азийн хошой аварга Э.Цэндбаатарын өрсөлдөгч жингээр хасагдсанаар тулаангүй шууд ялалт авч шөвгийн 16-д шалгарч үлдлээ.

Түүний дараагийн өрсөлдөгч Болгарын залуу боксчин Росенов Радослав.

Эрэгтэй 57 кг жинд Ази тивийн аварга, Универсиад наадмын аварга, Алдар спорт хороо, улсын шигшээ багийн тамирчин Х.Энх-Амар 2021 оны Белградын дэлхийн аваргын хүрэл медальт, Азийн аваргын мөнгөн медальт, Токиогийн олимпод оролцсон Ираны боксчин Шахбахши Данииалыг 3 үеийн турш илт илүүрхэж сайхан ялалт байгуулан шөвгийн 8-ын тулаанд шалгарлаа. Тулааны бичлэг лайваар орж ирсэнгүй ч онооны байдлаас харахад илт давуу байсан нь тодорхой байна. Нэг ч шүүгч нэг ч раунд Ираны боксчинд ялалт өгөөгүй байсан нь үүнийг гэрчилнэ.

Эмэгтэй 54 кг жинд 2023 оны дэлхийн аваргын хүрэл медальт, Алдар спорт хороо, улсын шигшээ багийн тамирчин М.Энхжаргал маань Японы боксчин Харада Микотаг 3 үе дараалан ялж гараа өргүүллээ. Энэ өдрийн бүтэн бичлэг нь явсан ганц тулаан. Эхний үеийн хонхны дуутай зэрэгцэн солгой өрөлттөй япон боксчин баруун гараар хатгаж баруун зүүн угсарсан цохилтоор нэмж шаргуу эхэлсэн юм.. Тэр ялна гэсэн итгэлтэй гарч иржээ. Харин манай боксчин хөл дээрээ хөнгөн ажиллаж, сайн мэдэрч шулуун, дороос, хажуугаас угтуулсан цохилтуудаар хариу барьж байсан нь өмнөх дэлхийн аваргаар тулалдаж байсан түүний тактик нь эрс өөрчлөгдсөн байдалтай харагдаж байсан юм.

Тэр үед Энхжаргал өөрийн ажиллах чадвар өндөр байдлыг ашиглаж 3 үеийн турш завсаргүй довтолж өрсөлдөгчөө ядраах тактикаар төгсгөлийн раунд илт давамгайлж голдуу ялж байв. Харин энэ удаа маш тайван хөл дэрээ хөнгөн ажиллаж, ялангуяа цээжний хөдөлгөөнөөр сайн мэдэрч бултаж, шулуун, хажуугийн, дороос цохилтуудаар угтуулж, боксын ёстой сонгодог техник үзүүлж байв. Эхний үеийн шүүгчдийн оноо манай талд 3:2-оор гарч ирсэн. Япон тамирчин шууд л хурдтай, тэсрэлттэй цохидог, сүүлийн үед япончуудын гаргаж ирээд байгаа, хоёр гараа буулгаж хөл дээрээ дэгдэж байгаад гэнэт үсэрч орж ирээд хаанаас ч хамаагүй цохиод шууд зуурч авдаг стилийг эзэмшсэн, хурдтай шаггүй боксчин бөгөөд энэ л аргаараа цохингуутаа тэврээд авдаг, ойрын зайнд дороос хажуугаас цохидог, зууралдах, барих зэргээр аргалдаг сэтгэл зүй муутай хүн юмуу гэж харсан. Энхжаргалын шууд угтуулсан зүүн баруун шулуун, ялангуяа баруун дороос зүүн хажуугаар төгсгөсөн цохилтууд илүү оновчтой байв.

Хоёрдугаар үед барьсан, зуурсан алдааны төлөө япон боксчинг рингийн шүүгч торгосон, Торгуулийн оноо бол тэнцүүхэн тулааны үед ялалтыг шийдвэрлэдэг онц ач холбогдолтой ч энэ тулааны хувьд нөлөөгүй байсан юм. 2-р үед япон боксчин цохингуутаа л зуураад манай хүнийг ажиллахад саад болж байсан нь бүр их болов. Энэ үеийн шүүгчдийн оноо мэдээж 5:0-оор манай талд. 3-р үед ч тоглолтын явц өөрчлөгдсөнгүй Энхжаргалын цохилтууд илүү байгаа онож бүх шүүгч нар мөн л 5:0 -оор ялалтыг монголын тамирчинд өгсөн байв. Ийнхүү Энхжаргал шилдэг 16-д шалгарч дараагийн шөвгийн 8-ын төлөөх даваанд Канадын боксчин Дельгадо Скарлеттай тулалдахаар боллоо.

Харин 71 кг жингийн өдрийн программаар манай боксчин О.Бямба-Эрдэнийн Энэтхэгийн боксчин Нишант Девтэй хийсэн тулаан жаахан эвгүй ялагдлаар өндөрлөсөн байв. Тулаан 1-р үед RSC-R1 буюу Энэтхэг боксчны илт давуу байдлаар төгсжээ. Ийнхүү энэ өдөр манай 3 боксчин ялалт байгуулж дараагийн шат буюу шөвгийн 8-ын төлөө тулалдахаар боллоо.

Эрэгтэй 51, 92, +92, эмэгтэй 50, 54, 57, 66, 75 кг жингийн шөвгийн 4-т үлдсэн боксчид, эрэгтэй 57, 80, эмэгтэй 60 кг жингийн эхний 3 боксчид, эрэгтэй 63,5 ба 71 кг жингийн эхний 5 боксчид олимпийн эрхээ авах ёстой. Зарим жинд плэй офф-ын тулаан болно гэсэн үг.

Өнөөдөр +92 кг-д манай Х.Бекнур Доминикагийн боксчинтой (өдрийн программаар) шөвгийн 16-д, Э.Цэндбаатар Болгарын боксчинтойй (оройн программаар) шөвгийн 8-д үлдэхийн төлөө тус тус тулалдана. Тамирчиддаа амжилт хүсье! Лайв хийсэн ОУХМ Шинэбаяртаа баярлалаа.