.png){kind=logo}
Өнөөдөр буюу 2024 оны 8 дугаар сарын 23-ны Баасан /Гэгээн/ гарагт болох зарим үйл явдлыг тоймлон танилцуулж байна.
Монгол Улсын Ерөнхийлөгч У.Хүрэлсүхийн урилгаар Бүгд Найрамдах Словени Улсын Ерөнхийлөгч Др.Наташа Пирц Мусарын манай улсад хийж буй төрийн айлчлал үргэлжилнэ.
Улаанбаатар хотноо: Монгол Улсын Ерөнхийлөгч У.Хүрэлсүхийн ивээл дор зохион байгуулж буй “Дэлхийн эмэгтэйчүүдийн чуулга уулзалт” Төрийн ордонд үргэлжилнэ.
Төрийн ордонд: УИХ-ын ээлжит бус чуулган энэ сарын 15-27-ны өдрүүдэд хуралдана.
9:00 цагт “Holiday Inn Ulaanbaatar”-ын 2 дугаар давхарт Хурлын танхимд: Орон нутгийн ээлжит сонгуулийг зохион байгуулах аймаг, нийслэлийн сонгуулийн хороодын дарга, нарийн бичгийн нарт зориулсан сургалт эхэлнэ. Холбогдох утас: 99122141
Сонгуулийн ерөнхий хорооны дэргэдэх Мэдээллийн технологийн төвөөс Мэдээллийн технолгийн багийн ахлагч нарт энэ сарын 22, 23-ны өдөр танхимын, 25-ны өдрөөс багийн гишүүдэд орон нутагт дадлага болон цахим сургалт зохион байгуулна.
Гурван өдөр үргэлжлэх "Улаанбаатар олон улсын явган алхалтын фестиваль 2024" өнөөдөр эхэлнэ
10:00-16:00 цагт Корпорейт Конвеншн центрт: “Монгол-Солонгосын жижиг дунд бизнес эрхлэгчдийн эдийн засгийн хамтын ажиллагаа-2024” уулзалт болно. Утас: 99047909
Горхи Тэрэлжийн БЦГ-т: "Хаадын Чингис хаан" морин шоу тоглолт энэ сарын 21-25-нд болж байна. Утас: 89913809
Г.Занабазарын нэрэмжит Дүрслэх урлагийн музейд: Монгол-Германы хооронд дипломат харилцаа тогтоосны 50 жилийн ойн хүрээнд дэлгэсэн хоёр улсын 15 уран бүтээлчийн “2 day in Mongolia” үзэсгэлэн энэ сарын 28 хүртэл үргэлжилнэ.
Чингис хаан Үндэсний музейд: Халх голын ялалтын 85 жилийн ойд зориулсан “Халх гол-85 жил” үзэсгэлэн 9 дүгээр сарын 16 хүртэл үргэлжилнэ.
Зэвсэгт хүчний 327 дугаар ангийн сургалтын төвд: Монгол Улс, ОХУ-ын Зэвсэгт хүчний хамтарсан “Сэлэнгэ’’ байлдааны буудлагатай тактикийн хээрийн сургуулийг энэ сарын 18-26-нд хоёр үе шаттай зохион байгуулна.
