.png){kind=logo}
Энэ сарын 14-нд Футзалын 10 дахь удаагийн ДАШТ ( FIFA Futsal World Cup 2024) Узбекистаны Ташкент, Бухара, Андижан хотуудад эхэлсэн билээ. Урьдчилсан тэмцээнээс шалгарсан 24 шилдэг баг 6 хэсэгт хуваагдан тоглож буй бөгөөд эхний өдрөөс л сенсаац, сюрприз дүүрэн эхэлсэн.
Та бүхэн хэсгийн тоглолтын явцаас тоймлон хүргэе.
"А" хэсэг: Узбекистан - Холланд, Парагвай - Коста Рика
Тэмцээнийг зохион байгуулагч ( ФИФА-гийн тэмцээн анх удаа Төв Азийн улсад зохиогдож байна) Узбекистаны шигшээ нээлтийн тоглолтод дэлхийн аваргын мөнгөн медальт Холландтай 3:3-аар тэнцэж, хөгжөөн дэмжигчдээ баярлууллаа. Гурван удаа гоол алдсанаа нөхөн сүүлчийн минутад тэнцээний гоолыг хийсэн. Тоглолт болж буй 12500 хүний суудалтай " Хумо арена" бол пиг дүүрэн. Уур амьсгал бол бас л гоё.
Хоёр дахь тоглолтоо Узбекууд Парагвайтай хийж 1:4-өөр хожигдлоо. Энэ хэсэгт Парагвай хоёр хожилтой ( эхний тоглолтод Коста Рикаг 5:2-оор хожсон) яваа бол Холланд хоёр дахь тоглолтдоо мөн л ( Коста Рикатай 2:2) хайнцлаа.
Сүүлийн тойрогт Узбекистан Коста Рикаг хожиход плей-оффт үлдэх бүрэн боломжтой явна.
"B" хэсэг: Бразил, Тайланд, Хорват, Куба
Футзалын ДАШТ-ий 5 алт, 1 мөнгө, 2 хүрэл медальт Бразил энэ хэсгийн төдийгүй тэмцээний гол фаворит.
Тэд Кубыг 10:0, Хорватыг 8:1-ээр тус тус төвөггүй хожин плей-оффт үлдэх эрхээ авсан.
Энэ хэсэгт мөн Хорватыг 2:1, Кубыг 10:5 -аар хожсон Тайландын шигшээ шөвгийн 16-д мөн шалгараад байна.
"С" хэсэг: Аргентин, Украин, Афганистан, Ангол
Дэлхийн АШТ-ий алт мөнгөн медальт Аргентин эхний тоглолтдоо Украиныг 7:1-ээр " машиндлаа".
ФИФА-ийн шигшээ тэмцээнд анх удаагаа " тоосоо өргөж" буй Афганистан Анголыг 6:4-өөр хожин түүхэн ялалт байгууллаа.
"D" хэсэг: Ливи, Испани, Казахстан, Шинэ Зеланд
Ливи ДАШТ-д 3 удаа оролцсон туршлага зааж, анх удаа орж буй Шинэ Зеландыг 3:1-ээр хожлоо.
Харин Казахстан футзалын яах аргагүй нэг гранд Испанитай 1:1-ээр тэнцэж шуугиуллаа. Гэхдээ Казахстан өмнөх ДАШТ-д шөвгийн дөрөвт үлдсэн муу баг биш шүү. Мэдээж иргэншлээ сольж Казахстаны шигшээд тоглодог бразил гаралтай тоглогчид багийн амжилтад чухал үүрэгтэй.
"Е" хэсэг: Португал, Марокко, Тажикстан, Панама
Дэлхийн аварга цолыг хадгалж буй Португал Панамаг 10:1-ээр бут ниргэсэн бол Марокко Тажикстаныг 4:2-оор хожив.
"F" хэсэг: Иран, Франц, Гватемал, Венесуэл
Азийн футзалын шилдэг баг, ДАШТ-ий хүрэл медальт Иран Венесуэлийг 7:1-ээр хөнгөхөн хожсон бол ДАШТ-д анх удаа орж буй Францын " мини-хөлбөмбөгчид" Гватемалаг 6:3-аар хожив.
Хэсгийн тоглолтын дараа хэсэг тус бүрээр шилдэг хоёр баг (12 баг), мөн хэсэгтээ 3 байр эзэлсэн багуудаас шилдэг үзүүлэлттэй 4 баг, нийт 16 баг хасагдах шатанд өрсөлдөх юм.
P.S. Футзалын ДАШТ-ийг 175 орон шууд дамжуулан үзүүлж буй бөгөөд АНУ-д Fox 1, Fox 2, Fox Soccer plus, Telemundo , Universo сувгуудаар гарах бол Монголд байгаа хөлбөмбөг сонирхогчид FIFA plus -аар үзэх боломжтой.
Эх сурвалж: Ц.Энхтүвшин Таван цагариг сонин
