Кёкүтэнхо өрх тусгаарлалаа

Мэргэжлийн сүмо бөхийн сэкивакэ асан, Монголын сүмогийн алтан хараацай Кёкүтэнхо хэмээх Оошима ояката Токио хотын Кацүшика дүүргийн Аотод шинэ дэвжээгээ нээлээ.

Нээлтийн ёслолд Исэгахама галын ояката нар оролцсон байна. Шинэ байрны шинэ дохён дээр Оошима дэвжээний 9 бөх анхны бэлтгэлээ хийжээ.

Оошима дэвжээний багш, бөхчүүд Намрын тэмцээн хүртэл Томозүна дэвжээнд амьдарч, бэлтгэл хийж байсан юм. Ингээд Кёкүтэнхо шинэ байрандаа орж, өрх тусгаарлалаа. Гурван давхар барилгад цолтой бөхчүүдийн өрөө, залуу бөхчүүдийн нийтийн том өрөө, бэлтгэлийн өрөө гээд бүх зүйл байгаа бөгөөд есдүгээр сарын 29-нд нүүж оржээ.

Тэрбээр: “Одоо л нэг дэвжээ эзэмшсэн ояката жинхэнэ утгаараа боллоо. Баяртай байна. Эхнэр, 3 хүүхэд маань ч энэ байранд амьдарна. Гол анхаарах зүйл маань шинэ, залуу бөхчүүд байлаа. Тэдний өрөөг гэрийнхээ өрөөний хажууханд байрлууллаа. Аав ээжээс нь хүүхдийг нь сүмо бөх болгоно гээд авсных сайн харж хандахгүй бол болохгүй. Насанд хүрээгүй хүүхэд ч байгаа. Өмнөх байранд залуу бөхчүүдийн өрөө өөр давхарт байлаа. Байн байн утсаар байдлыг асуудаг ч дэргэдээ байлгасан нь дээр юм гэж бодсон. Дэвжээ гэдэг бол нэг гэр бүл” гэж сэтгүүлчдэд ярьсан байна.

Оошима дэвжээ одоогоор цолтой бөх байхгүй. Дээд зиндаанд барилдаж, тусгай шагнал авч байсан Кёкүтайсэй, Монголын Ш.Далайбаатар Кёкүкайюү гэсэн хоёр макүшита бөхтэй. Шинэ байранд цолтой бөхийн гурван өрөө бэлтгэсэн байгаа тул Оошима ояката “Хурдхан шавиа цолонд хүргэмээр байна. Залуу бөхчүүдийг дэвжээндээ урьж байхад өөр дэвжээний байранд түрээсээр байсан бол одоо өөрийн гэсэн байртай болсон тул Оошима дэвжээгээ сурталчлаад хичээнэ дээ” гэж байв.