.png){kind=logo}
Олон улсын эрдэс баялаг, уул уурхайн 11 дэх жилдээ зохион байгуулагдаж буй "IMARC 2024" чуулга уулзалт Австралийн Сидней хотноо албан ёсоор эхэллээ.
Дэлхийн уул уурхайн салбарын тэргүүлэгчид, салбарын мэргэжилтнүүд болон оролцогч талуудыг нэгтгэсэн уг чуулгад Монгол Улсаас Аж үйлдвэр, эрдэс баялгийн сайд Ц. Туваан, УИХ-ын гишүүд, уул уурхайн ТӨҮК-уудын удирдлагууд, Монголын Уул уурхайн үндэсний ассоциацийн төлөөлөл, элчин сайд Д. Даваасүрэн, хатагтай Кэти Смит нар оролцож, Монголын хөрөнгө оруулалтын боломжууд, хууль эрх зүйн орчныг танилцуулахаас гадна томоохон төсөл хэрэгжүүлэгчид өөрсдийн төслүүдийн явцыг танилцуулах юм.
Чуулганы нээлтийн хэлэлцүүлгүүд нь “Чухал ашигт малтмалын нэмүү өртгийн сүлжээг байгуулах нь” сэдвээр өрнөж байна. Энэхүү сэдвээр ногоон технологи болон эрчим хүчний шилжилтийг түргэсгэхэд нэн чухал эрдсүүдийн тогтвортой, найдвартай ханган нийлүүлэлтийн сүлжээг бий болгох шаардлагыг онцолж буй юм.
10 дугаар сарын 29-31-ний өдрүүдэд үргэлжлэх “IMARC 2024” арга хэмжээнд 300 гаруй компани, түүний дотор 90 гаруй уул уурхайн компаниуд оролцож, салбарын хамгийн сүүлийн үеийн шинэчлэл, хөгжлийг танилцуулж буй юм. Мөн 9000 гаруй оролцогч ирж, салбарын хөгжлийн талаар хэлэлцүүлэг өрнүүлэх, хамтын ажиллагааг бэхжүүлэх өргөн боломжийг олгох юм.
Монгол Улс “IMARC 2024” арга хэмжээнд идэвхтэй оролцсоноороо олон улсын түншлэлээ хөгжүүлэх, дэлхийн уул уурхайн салбарт эзлэх байр сууриа бэхжүүлэх эрмэлзлээ мөн илэрхийлж байна.
Эх сурвалж: Аж_үйлдвэр_эрдэс_баялгийн_яам
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!