Озэки Хошёорюү С.Бямбасүрэн, Таканошо, Онокацү Б.Чойжилсүрэн нар 5 даваатай Кюүшюү башёг тэргүүлж байна

Японы мэргэжлийн сумо бөхийн Кюүшюү башёгийн 5 дахь өдрийн /2024.11.13/ барилдаанд Озэки Хошёорюү С.Бямбасүрэн, Вакатакакаге /М-2/-тэй учраа таарч барилдан түүнийг котенаге мэхээр хаяснаар 5 даваатай башёг үргэлжлүүлж байна.

Харин энэ өдөр Озэки Котозакүра, Ура /М-2/-тай барилдаж түүнийг ошидаши мэхээр давснаар 4 даваа, 1 унаатай болов.

Энэ башёд Озэки цолтой барилдаж байгаа Оносато, Атамифүжи /М-3/-тэй учраа тааран барилдаж түүнийг ошидаши мэхээр давснаар 1 унаа, 4 даваатай болоод байна.

Комүсүби Шодай энэ өдөр Сэкиваке Дайэйшёо-той учраа тааран барилдаж түүнд ошидаши мэхээр унаснаар 1 даваа 4 унаатай болоод байгаа бол Дайэйшёо 3 даваа 2 унаатай боллоо.

Комүсүби Вакамотохару энэ өдөр Хирадоүми /М-1/-тэй барилдаж түүнийг ошидаши мэхээр давснаар 3 даваа, 2 унаатай болов. Харин Хирадоүми 1 даваа, 4 унаатай болоод байна.

Энэ өдөр Сэкивакэ Киришима Б.Лхагвасүрэн Охо /М-1/-той, учраа тааран барилдаж, түүнд хикиотоши мэхээр ойчиж, башёг нэг ч даваагүй 5 унаатай үргэлжлүүлж байна.

Хамгийн ахмад сумочдын нэг Тамаваши Б.Мөнх-Оргил /М-11/ өнөөдөр Мэйсей /М-11/-тэй таарч барилдан түүнд ёрикири мэхээр унаснаар 2 даваа, 3 унаатай башёг үргэлжлүүлж байна. Түүнчлэн өчигдөр Озэки Оносатаог давсан Аби /М-3/, Чураноүми /М-4/-той хүч үзэж түүнийг цүкидаши мэхээр хаяснаар 4 даваа 1 унаатай боллоо.

Ошома П.Дэлгэрбаяр /М-4/ энэ өдөр Таканошо /М-5/-той таарч барилдан түүнд сүкүинаге мэхээр унаснаар 1 даваа, 4 унаатай болоод байна.

Чиёошома /М-14/, Саданоүми/М-12/-тэй энэ өдөр хүч үзэж түүнд сүкүинаге мэхээр унаж 3 даваа, 2 унаатай башёг үргэлжлүүлж байна.

Энэ өдөр Онокацү Батжаргалын Чойжилсүрэн /М-15/, Бушозан /М-17/-тай учраа тааран барилдаж түүнийг ёрикири мэхээр хаяснаар 5 даваатай болоод байна.

Ийнхүү 5 дахь өдөр буюу өнөөдрийн байдлаар Озэки Хошёорюү С.Бямбасүрэн, Таканошо /М-5/, Онокацү Б.Чойжилсүрэн /М-15/ нар 5 даваатай Кюүшюү башёг тэргүүлж явна.