Их аварга Тэрүнофүжи Таканошёог, Озэки Хошёорюү Тобизарюүг давлаа

Токио хотноо өнөөдөр мэргэжлийн сумо бөхийн 2025 оны нэгдүгээр сарын Хацү башёгийн 2 дахь өдрийн барилдааны тоймыг сонирхуулж байна.

Дээд буюу Макүүчи зиндаанд Их аварга Тэрүнофүжи Г.Ган-Эрдэнэ тэргүүтэй Монголын 8 сумоч хүч, ур чадвараа сорин барилдаж байна.

Монголын сумоч Тамашохо Эрдэнэбилэгийн Энхманлай /М-16/ энэ башёд анх удаа Макүүчид дэвшин барилдаж байна. Хацү башёг даваагаар эхлүүлсэн Тамашохо энэ өдөр Нишикифүжи /М-17/-тэй учраа таарч түүнд цүкидаши мэхээр унаж 1 даваа, 1 унаатай боллоо.

Энэ өдөр Онокацү Б.Чойжилсүрэн /М-12/, Котошохо /М-13/-той хүчээ сорин барилдаж түүнд ёрикири мэхээр ойчиж даваа, унаа адил 1 болов.

Сумо бөхийн энэ цаг үеийн хамгийн ахмад бөх Тамаваши Б.Мөнх-Оргил /М-10/, Чураноүми /М-9/-тэй учраа таарч барилдан түүнийг ошидаши мэхээр унагаж башёг 2 даваатай үргэлжлүүлж байна.

Ошома П.Дэлгэрбаяр/М-9/, Такарафүжи/М-8/-тэй учраа таарч түүнийг ошидаши мэхээр хаяж 2 даваатай байна.

Харин Чиёошома Г.Мөнхсайхан /М-5/, энэ өдөр Ура /М-4/-тай учраа таарч барилдан түүнийг уватэнаге мэхээр унагаж 2 даваатай башёг үргэлжлүүлж байна.

Озэки Котозакура, Комүсүби Аби-тэй учраа тааран хүч үзэж түүнд цүкидаши мэхээр унаснаар тэд адилхан 1 унаа, 1 даваатай болов.

Харин Озэки Оносато энэ өдөр Киришима Б.Лхагвасүрэн /М-1/-тэй барилдахад Киришима түүнд ошидаши мэхээр ойчиж башёг 2 унаатай үргэлжлүүлж байна.

Энэ башёд аварга цол авах эсэхээ шийдэх Озэки Хошёорюү С.Бямбасүрэн Тобизарюү /М-2/-тэй хүчээ сорин түүнийг ёритаоши мэхээр давж 2 даваатай боллоо.

Өнгөрсөн оны сүүлийн 4 башёд бэртлийн улмаас өнжөөд байсан 73 дахь Их аварга Тэрүнофүжи Г.Ган-Эрдэнэ Хацү башёгийн 2 дахь өдөр Таканошёо /М-1/-той барилдаж түүнийг ёрикири мэхээр давлаа.