.png){kind=logo}
Энэ сарын 16-нд Монголын Мэргэжлийн Боулингийн Тамирчдын Холбооны Анхдугаар тэмцээн Яармаг дахь 16 зам бүхий боулингийн төвд амжилттай боллоо.
Боулингийн мэргэжлийн тамирчдын чансааг ахиулах шинэчилсэн зохион байгуулалтад оруулах, олон улсын мэргэжлийн боулингчдын тэмцээнд бэлтгэх зорилготой тус тэмцээнд зөвхөн эргүүлэгтэй шидэлттэй тамирчид оролцсоноороо онцлог. Тамирчид 1 гараар эргүүлэгтэй шидэх, 2 гараар эргүүлэгтэй шидэж өрсөлдсөн. Мөн эрэгтэй, эмэгтэй ангилалгүйгээр эмэгтэй тамирчдад “handicap” буюу “халаасны нэмэлт оноо”-г тоглолт тус бүр дээр +15 оноог өгч эрэгтэй тамирчидтай өрсөлдсөн. Нэг баг 3 хүний бүрэлдэхүүнтэй бөгөөд багийн бүрэлдэхүүнийг сугалаагаар тодруулсан юм. “Handicap” буюу халаасны нэмэлт оноо нь олон улсад ашиглагддаг жишиг стандарт билээ.
Мэргэжлийн боулингчдын энэхүү тэмцээнд нийт шилдэг 48 тамирчин оролцож урьдчилсан шатанд бүх тамирчид 6 тоглолтыг гүйцэтгэж нийлбэр дүнгээр Шилдэг 8 багийг шалгаруулж, нугалах буюу нэгээр гарсан тамирчин 8-аар гарсан тамирчинтай халз тоглох (1vs8) зарчмаар аваргаар тодруулсан.
Ганцаарчилсан төрөлд:
Тэргүүн байранд: Б боулинг клубын тамирчин, спортын мастер Ш.Баатар шалгарч - Алтан медаль, мөнгөн шагнал, тоглолтын эрх
2-р байранд: Централ клубын тамирчин Г.Туул - Мөнгөн медаль, мөнгөн шагнал, тоглолтын эрх, дурсгал үнэ бүхий зүйлс
3-р байранд: Б боулинг клубын тамирчин Э.Батсайхан - Хүрэл медаль, мөнгөн шагнал-тоглолтын эрх, үнэ бүхий зүйлс
Шилдэг өндөр оноотой тамирчнаар Э.Ган-Эрдэнэ 257 оноогоор шалгарч Мөнгөн шагнал-тоглолтын эрх, үнэ бүхий зүйлсээр шагнууллаа.
Багийн төрөлд:
Тэргүүн байранд: Х.Хишигбат ахлагчтай П.Чинбаяр, Х.Тулга нарын баг-Алтан медаль, мөнгөн шагнал, тоглолтын эрх, үнэ бүхий зүйлс
2-р байранд: ОУХМ Ш.Баатар ахлагчтай Э.Бат-Орших, Э.Батсайхан нарын баг-Мөнгөн медаль, мөнгөн шагнал, тоглолтын эрх, үнэ бүхий зүйлс
3-р байранд: Б.Мягмарцэнд ахлагчтай Ш.Мөнхжаргал, н.Мөнхбаяр нарын баг-Хүрэл медаль, мөнгөн шагнал,тоглолтын эрх, үнэ бүхий зүйлсээр шагнууллаа.
Цол, зэргийн болзол хангаад авч чадаагүй байсан тамирчид тус тэмцээний үеэр цол, зэргийн үнэмлэх, энгэрийн тэмдгээ гардаж авсан. Монголын боулингийн түүхэнд анх удаа төрсөн ОУХМ Х.Өлзий-Хорол, М.Түвшинсанаа, Ж.Содномдорж нар үнэмлэх, тэмдгээ гардан авлаа. Мөн Х.Хишигбат, Х.Цацрал, Х.Тулга (ах дүү гурав), Б.Мягмарцэнд, Т.Нансалмаа, Б.Батхүү, Д.Чулуунбаатар, Г.Ууганбаатар нар Спортын мастерын үнэмлэх, тэмдгээ гардлаа.
Монголд мэргэжлийн боулингийн замын тосолгооны машин орж ирснээр эргүүлэгтэй шиддэг тамирчдын амжилт эрс ахисан. Энэ нь манай тамирчид гадаадад олон улсын тэмцээнд оролцож амжилт олоход нэмэр болж байгаа билээ.
Цаашид Монголын Мэргэжлийн Боулингийн Тамирчдын Холбоо нь сар бүр ангилал тус бүрээр олон төрөлт тэмцээнүүдийг уламжлал болгон зохион байгуулахаар төлөвлөж байна.
Эх сурвалж: МССХ
