“Хааны эрэлд-2026” энхийг дэмжих ажиллагааны олон улсын сургууль эхэллээ

Улаанбаатар, 2026 оны зургаадугаар сарын 20 /МОНЦАМЭ/. Даян дэлхийн энх тайвны төлөө тив дэлхийн өнцөг булан бүрээс хүрэлцэн ирсэн 18 орны төрийн далбаа ‘’Тавантолгой’’ дахь Зэвсэгт хүчний Сургалтын нэгдсэн төвд нэгэн зэрэг мандаж ‘’Хааны эрэлд-2026’’ энхийг дэмжих ажиллагааны олон улсын сургууль албан ёсоор нээлтээ хийлээ.

Монгол Улс болон АНУ-ын батлан хамгаалах салбар хоорондын хамтын ажиллагааны хүрээнд хоёр талын хамтарсан хээрийн сургууль хэлбэрээр анх зохион байгуулагдсанаас хойш жилээс жилд өргөжин хөгжиж олон улсын статустай болон 20 жилийн ойтойгоо золгож буй. Түүнчлэн ‘’Хааны эрэлд’’ сургуулийг үүсгэн байгуулж, 20 жилийн турш тасралтгүй хөгжүүлэхэд өндөр хувь нэмэр оруулсан АНУ-ын Энэтхэг-Номхон далайн цэргийн командлал, хамтрагч улс орнууд, олон улсын байгууллагууд болон үе үеийн зохион байгуулагчдын тууштай зүтгэлийн үр дүн юм.

Дэлхийн 18 орны 1100 гаруй цэргийн алба хаагч оролцож буй энэ жилийн сургуулийн үйл ажиллагаанд команд штабын, хээрийн сургуулийн болон мэргэжлийн сургалтын гэсэн үндсэн чиглэлээр зохион байгуулж байна. Мөн орчин үеийн аюулгүй байдлын орчинтой уялдуулан нисгэгчгүй нисэх төхөөрөмжийн хэрэглээтэй холбоотой сургалт, дадлагыг тусгасан байна.

Тус сургууль нь энхийг эрхэмлэсэн Монгол Улсын гадаад бодлогод томоохон байр суурийг эзэлж, эвийн хүч, эв найрамдал, найрсаг харилцаа, дипломат аргаар энх тайвныг сахин хамгаалах дуу хоолойгоо даян дэлхийд түгээхийн зэрэгцээ Монгол Улсын Зэвсэгт хүчний сургалт, бэлтгэл, үүрэг гүйцэтгэх чадавх болон дэлхийн олон орны энхийг сахиулагчдын мэдлэг, ур чадвар, дадлага туршлагыг нэмэгдүүлэхэд чухал ач холбогдолтой сургууль юм.

Сургуулийн нээлтэд Монгол Улсын талаас УИХ,Засгийн газрын гишүүн Батлан хамгаалахын сайд Д.Батлут, ЗХЖШ-ын дарга дэслэгч генерал С.Ганбямба болон БХЯ, ЗХЖШ-ын удирдлага, Төрийн цэргийн болон хууль сахиулах байгууллагын дарга нар, төрлийн цэргийн командлагч, удирдах газрын дарга нар, Монгол улсад суугаа Элчин сайдууд, цэргийн атташе нар тэргүүтэй хүндэт зочид болон гадаадын 18 улс орны 1100 гаруй цэрэг дайчид, хэвлэл мэдээллийн байгууллагын төлөөлөл оролцов.

Нээлтэд АНУ-ын Номхон далайн цэргийн командлалын орлогч дарга дэслэгч генерал Жорж Роуэл, АНУ-аас Монгол Улсад суугаа Онц бөгөөд Бүрэн эрхт Элчин сайд Ричард Буанган нар нээлтийн үг хэллээ. Тэд Монгол улсын Энхийг сахиулагчдын олон улсад гүйцэтгэж буй оролцоог өндрөөр үнэлж явдгаа онцлон тэмдэглэсэн юм.