.png){kind=logo}
Ханжоу хот /burged61.mn/ Монголын боксын шигшээ багийн ахлах дасгалжуулагч, Монгол Улсын гавьяат дасгалжуулагч Ж.Энхтөртэй уулзаж, “Ханжоу-2022” Азийн наадамд хүчээ сорьж байгаа тамирчдын сэтгэл зүй, эрч хүч, бэлтгэлжилт ямар байгаа талаар сонирхлоо.
-Монголын шигшээ баг тамирчдын хувьд бэлтгэл сургуулилтаа сайн базаасан байх. Энэ удаагийн Азийн наадмын онцлог юу байна. Манай тамирчдын оноолт, сугалаа ямар байв?
-Энэ удаагийн Азийн наадмын хувьд “Парис-2024” олимпын наадмын эрх өгөх том шалгуур байгаа гэдгээрээ онцлогтой. Бид Азийн наадамд ирэхээсээ өмнө БНХАУ-ын Хайлаар хотод хамтарсан бэлтгэлд хамрагдаад ирлээ. Манай холбооны ерөнхийлөгч, ХЗДХ-ийн сайд Х.Нямбаатар болон МБХ-ны УЗ-ийн дэмжлэгтэй энэ бэлтгэлд хамрагдсан маань маш үр дүнтэй байлаа. Энэ удаагийн хамтарсан бэлтгэлд Хятадын 11 мужийн болон ОХУ-ын шигшээ багийн тамирчид нийлсэн 150-иад боксчид хамтарсан бэлтгэл хийж, харилцан туршлага солилцлоо. Ханжоугийн наадамд оролцож байгаа тамирчид олимпын эрхийн төлөө өрсөлдөх болохоор өмнөх тэмцээнүүдээс хэцүү, илүү өрсөлдөөнтэй, маш өндөр шалгууртай, чанартай болж байна. Ялангуяа Казахстан, Узбекистан, Япон, Тайланд, Филлиппин, Хятадын гээд бүх л орны шилдгүүд ирсэн байна. Ер нь энд сул баг, тамирчин гэж байхгүй бүгд л эн тэнцүү хүчтэй. Энэ наадмаас олимпын эрхээ авна гэдэг үнэхээр бэрхшээлтэй хэдий ч бид ялахын төлөө бүх тактик, нөөц бололцоо, хүч, ур чадвараа дайчилж байна. Манай хэд хэдэн тамирчин ялагдлаа. Тамирчид маань бүгдээрээ л хамаг хүч, боломжоо дайчилж эн тэнцүү сайн тулалдлаа. Дараа дараагийн ялалтын төлөө, туршлага хуримтлуулж авлаа. Дэлхийн аваргаас даагаа нэхэж ялсан тулаан ч боллоо. Тэмцээн шийдвэрлэх шатандаа ороод ид үргэлжилж байна даа.
Гэрэл зургийг Д.Амаржаргал, Ч.Ганбат Монголын спортын сэтгүүлчдийн холбоо
-Ханжоугийн наадмаас олимпын эрхийг хэрхэн авах талаар тодруулж ярина уу?
-Эмэгтэй тамирчдын хувьд 50-60 кг-д жиндээ эхний дөрөвт шалгарсан тамирчид олимпын эрхээ авна. Харин 60-аас дээш жинд алт, мөнгөн медаль авсан тамирчид л эрхээ өвөртөлнө. Эрэгтэй боксчдын хувьд зөвхөн 63,5 кг жингээс эхлээд алт, мөнгөн медаль хүртсэн тамирчдад олимпын эрх олгоно.
Парисын олимпын эрх олгох дараагийн ямар тэмцээнүүд манай тамирчдыг хүлээж байгаа бол?
-Дараагийн эрх олгох тэмцээн гэвэл он гараад Итали улсад болох тэмцээн байна. Мөн 2023 оны 5 дугаар сард Тайланд улсад олимпын эрх олгох сүүлийн тэмцээн байгаа. Ер нь ОУБХ-ны зарим жинг хасаад олимпын жинд өөрчлөлт оруулснаар 48, 54, 60 кг жингүүд байхгүй болж Азийн болон манай боксчдын хувьд гол амжилт гаргадаг жин нь хасагдсан гэж болно. Энэ удаагийн Азийн 19 дүгээр наадмын сугалаа манай тамирчдын хувьд бас л чанга байлаа. Гэхдээ бид бүх нөөц, боломж, ур чадвараа гаргаж өрсөлдөж байгаа болохоор үр дүн гарч байна. Манай боксчдоос анхны олимпын эрхээ аваад байгаа. Тамирчид маань бэлтгэл сайн, эрч хүч дүүрэн, сэтгэл зүйн хувьд ч их өөдрөг байна.
