.png){kind=logo}
Фүкүока хотноо үргэлжилж байгаа Японы мэргэжлийн сумо бөхийн 11 дүгээр сарын Кюүшюү башёгийн 13 дахь өдрийн барилдаанд Озэки Киришима Б.Лхагвасүрэн, Сэкиваке Дайэйшо-той барилдаж түүнийг хатакикоми мэхээр давснаар 11 даваа, 2 унаатай башёг үргэлжлүүлж байна.
Энэ өдөр. Озэки Хошёорюү С.Бямбасүрэн, Озэки Такакэйшо-той учраа таарч барилдан, түүнд цүкиотоши мэхээр унаж 8 даваа, 5 унаатай болоод байна. Такакэйшо 9 даваа, 4 унаатай боллоо.
Тамаваши Б.Мөнх-Оргил /М-12/ энэ өдөр Митакэүми /М-9/-тэй учраа тааран хүч үзэж, түүнд ошидаши мэхээр унаж 8 даваа, 5 унаатай башёг үргэлжлүүлж байна.
Мөн Хокүсэйхо А.Даваанинж /М-7/, Тобизарюү /М-3/-тэй таарч барилдан түүнд окүридаши мэхээр унаснаар 6 даваа, 7 унаатай боллоо.
Макүүчид анх удаа дэвшин барилдаж байгаа ОХУ-ын Тувагийн монгол бөх Рога А.Амарсанаа /М-16/ энэ өдөр Мёогирюү /М-9/-тэй учраа таарч хүч үзэн түүнийг цүкиотоши мэхээр хаяж 4 даваа, 9 унаатай болов.
Энэ өдөр 10 даваатай тэргүүлэгчдийн эгнээнд яваа Атамифүжи /М-8/, Такаясү /М-3/-тэй учраа таарч барилдан, түүнийг ошидаши мэхээр хаяж 11 даваа, 2 унаатай башёг тэргүүлсээр байна. Тэрбээр 2002 онд Шизүока мужид төрсөн, 21 настай, өндөр нь 186 см, жин 181 кг юм байна.
