П.Дэлгэрнаран: Аймаг, нийслэл, сум, дүүргийн ИТХ-ын сонгуулийн бэлтгэлийг бүрэн хангасан

Улаанбаатар, 2024 оны аравдугаар сарын 10 /МОНЦАМЭ/. Аймаг, нийслэл, сум, дүүргийн ИТХ-ын 2024 оны ээлжит сонгууль маргааш албан ёсоор эхлэхтэй холбогдуулан Сонгуулийн ерөнхий хороо, Улсын бүртгэлийн ерөнхий хороо, Цагдаагийн ерөнхий газар хамтран мэдээлэл хийв.

СЕХ-ны дарга П.Дэлгэрнаран, “Орон нутгийн хурлын сонгуулийн санал хураалт маргааш 7 цагаас эхэлж, 20 цагт өндөрлөнө. Өнөөдрийн байдлаар тус сонгуулийн бэлтгэл ажил бүрэн хангагдсан” хэмээн мэдэгдэв. Тэрбээр цааш ярихдаа, ”Тус сонгууль 7 -20 цагийн хооронд үргэлжилнэ. Улсын хэмжээнд 2230 хэсгийн хороонд 20 мянга гаруй төрийн албан хаагч ажиллана. Мэдээлэл технологийн 169 багт 2683 ажилтан ажиллаж, энэ талын бэлтгэлийг бүрэн хангалаа. Улсын бүртгэлийн итгэмжлэгдсэн 2337 ажилтан ажиллана. Үүнээс гадна сонгуулийн аюулгүй байдлыг хангахаар цагдаа, онцгой байдлын болон бусад албаны 10600 алба хаагч, 500 техник хэрэгсэлийг бэлэн байдлыг хангаад байна.

Орон нутгийн хурлын сонгуульд 10 нам, нэг эвслийн 17 278 нэр дэвшигч болон 268 бие даагч 8031 мандатын төлөө өрсөлдөнө. Тэдгээрийн 5582 нь буюу 32.3 хувь нь эмэгтэйчүүд юм. Орон нутгийн хурлын сонгуулийн хуульд жендерийн босгыг 20 хувиар тогтоосон байдаг ч энэ удаа нам эвслүүд эмэгтэй нэр дэвшигчдийг олноор нь нэр дэвшүүлсэн байна.

Улсын хэмжээнд 104 500 менежер, шадар туслах, ухуулагч сонгуулийн сурталчилгаанд ажилласан. Нам эвсэл, төрийн бус байгууллага, энгийн иргэдээс бүрдсэн 17 800 ажиглагч маргааш сонгуулийн явцыг ажиглахаар, ажиглагчийн үнэмлэхээ авсан. Өнөөдрийн байдлаар зөөврийн битүүмжилсэн хайрцгаар санал авах ажил явагдаж байна.

Сонгуулийн ерөнхий хороо, Улсын бүртгэлийн ерөнхий газраас гаргасан сонгогчдын нэрсийн жагсаалтад нийт 2.246.164 иргэн бүртгэгдсэн. Үүний 1.1 сая нь Улаанбаатар хотод, үлдсэн хувь нь орон нутгийн иргэд юм.

Санал тоолох төхөөрөмжийг 1500-гаас дээш хүн амтай хэсгийн хороонд хоёрыг байршуулсан ба түүнээс цөөн хүн амтай бол нэгийг тус тус байршууллаа. Нийт 2824 санал тоолох төхөөрөмжийг сонгуулийн үеэр ашиглана. Шалган турших ажиллагааг цаг хугацаанд нь хийж, санал авах байранд байршуулсан болно.

Интернэтийн сүлжээгүй 381 хэсгийн хороо байгаа ба тэдгээрийг "Starlink" сүлжээг холбосон. Мөн “Сонгогчийн цахим хөтөч” гарын авлагыг өрх бүрд хүргүүлсэн. Тус гарын авлага дахь бар кодыг уншуулж, дэлгэрэнгүй мэдээлэл авах боломжтой. Нийт иргэддээ хандаж хэлэхэд сонгуульдаа идэвхтэй оролцохыг уриалж байна” гэлээ.

УБЕГ-ын дарга Д.Дэлгэрсайхан, “УБЕГ-аас ажлын хэсэг гарган, сонгуультай холбоотой ажлыг төлөвлөгөөний дагуу зохион байгууллаа. Иргэдийн шилжилт хөдөлгөөнийг энэ оны наймдугаар сарын 12-ны өдрөөс түр хугацаанд зогсоож, аравдугаар сарын 12-ноос сэргээх юм. Есдүгээр сарын 29-ний өдрөөс аравдугаар сарын 6-ны өдрийн хооронд холбогдох сургалтуудыг зохион явууллаа. Сонгогчдын нэрсийн жагсаалтыг хоёр удаа хэвлэж, хэсгийн хороодод хүргүүлээд байна. УБЕГ-т сонгогчдын нэрсийн жагсаалттай холбоотой ямар нэг гомдол ирээгүй. Сонгуулийн ерөнхий хороогоор дамжуулж нэг иргэн хаягийн мэдээллээ шалгуулсан. Улсын бүртгэлийн burtgel.gov.mn хаягт хандан, иргэд мэдээллээ шалгах боломжтой. Одоогийн байдлаар 26 мянган иргэн мэдээллээ шалгасан байна" гэлээ.

Цагдаагийн ерөнхий газрын Мөрдөн байцаах газрын дарга, хурандаа н.Очгэрэл "Сонгуулийн үеэр ажиллах бие бүрэлдэхүүний бэлэн байдал хангагдсан гэдгийг хэлээд, нам эвслээс ирүүлсэн гомдол мэдээллийг бүртгэлжүүлж, шалгаж байна" гэв.