Өнөөдөр: Эдийн засгийн түншлэлийн хэлэлцээрийн талаар уулзалт зохион байгуулна

Өнөөдөр буюу 2024 оны 11 дүгээр сарын 13-ны Лхагва /Үлэмж/ гарагт болох зарим үйл явдлыг тоймлон танилцуулж байна.

Монгол Улсын Ерөнхийлөгч У.Хүрэлсүх Бүгд Найрамдах Азербайжан Улсын Ерөнхийлөгч Ильхам Алиевийн урилгаар энэ сарын 12-13-нд Баку хотноо болж буй Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтад оролцож байна.

Төрийн ордонд: Засгийн газрын ээлжит хуралдаан болно.

10:00-12:30 цагт МҮХАҮТ-д: Эдийн засгийн түншлэлийн тухай Монгол Улс, Япон улс хоорондын хэлэлцээрийн хэрэгжилт, бизнес эрхлэгчдэд тулгамдаж буй асуудлаар уулзалт зохион байгуулна.

11:00 цагт "Монгол ньюс" компанийн Мэдээллийн төвд: Сүхбаатарын талбайд энэ сарын 15-нд улс төрийн тайван цуглаан зарлаж, Засгийн газрыг огцрохыг шаардан, иргэдээс гарын үсэг зуруулах талаар Монголын коммунист нам байгуулах холбооноос мэдээлэл хийнэ.

11:30 цагт "Зууны мэдээ" сонины мэдээллийн төвд: 11 дүгээр сарын 26-нд цуглаан зохион байгуулах, мөн Засгийн газрын үйл ажиллагааны хөтөлбөр Үндсэн хууль зөрчсөн тухай Үндсэн хуулийн цэцэд хандаж, улс төрийн намуудаас хэвлэлийн бага хурал хийнэ. Утас: 99790206, 80190070

14:00 цагт МҮХАҮТ-ын Их танхимд: “Ногоон эдийн засаг, ногоон бизнес- Эрчим хүчний шилжилт” үйл ажиллагааг Европын Холбоо, ЕСБХБ, МҮХАҮТ хамтран зохион байгуулна. Утас: 88107869

16:00 цагт Чингис хаан музейн VII давхарт: "Цагаан зээрийн янзага" баримтат киноны нээлт болно.