.png){kind=logo}
НЬЮ-ЙОРК, 2026 оны хоёрдугаар сарын 2 /Кazinform/. “Amazon” компанийг үүсгэн байгуулагч Жефф Безосын “Blue Origin” компани сансрын аялал жуулчлалын “New Shepard” хөтөлбөрөө хоёр жилийн хугацаагаар зогсоож байгаагаа мэдэгджээ.
Уг төслийн оронд тус компани АНУ-ын сансар судлалын NASA агентлагийн сансрын нисгэгчдийг Сар луу илгээх нислэгүүдэд бэлтгэх ажээ.
NASA-гийн "Artemis" хөтөлбөрийн хүрээнд сансрын нисгэгчдийг Сар луу хүргэх буугч модулийг зохион бүтээх гэрээг "Blue Origin" компани NASA агентлагтай байгуулаад байгаа юм. Эхэндээ Безосын компанийн модулийг “Artemis V” хөтөлбөрт ашиглахаар төлөвлөж байсан боловч “Artemis III” ба “Artemis IV” хөтөлбөрүүдийн хөлгийг зохион бүтээж буй “SpaceX компанийн төсөл хуваарийн дагуу хэрэгжихгүй байгаа тул NASA-гийн зүгээс "Blue Origin" ба "SpaceX"-ийг “Artemis III” хөтөлбөрийн нислэгийг үйлдэхэд хамтран ажиллахыг хүссэн байна. Хоёр талын байгуулсан гэрээний үнийн дүн 3.4 тэрбум ам.доллар бөгөөд энэ нь "New Shepard" хөтөлбөрийн орлогоос хамаагүй их юм.
АНУ-ын сансрын судлалын агентлаг 2030 он гэхэд Саран дээр байнгын оршин суух дэд бүтцийг байгуулж, цөмийн реактор барихаар төлөвлөж байгаа юм. Тус улс Сарыг эзэмших хөтөлбөр хэрэгжүүлж буй Орос, Хятадаас түрүүлэх зорилготой гэж шинжээчид дүгнэж байна. АНУ-ын Ерөнхийлөгч Д.Трамп хоёр дахь бүрэн эрхийнх нь хугацаа дуусгавар болохоос өмнө буюу 2028 онд Сар луу сансрын нисгэгч илгээх тухай зарлигт өнгөрсөн оны 12 дугаар сард гарын үсэг зурсан билээ.
"New Shepard" пуужинг 2021 оноос хойш сансрын дэд тойрог замын /суборбитал/ нислэгүүдэд ашиглажээ. Энэ хугацаанд Баруун Техаст байрлах "Blue Origin"-ы хөөргөх талбайгаас 38 удаа хөөрч, 92 хүнийг дэд тойрог замд аялуулжээ. 2024 оны 4 дүгээр сард "Blue Origin" компани АНУ-ын дуучин Кэти Перри, тухайн үед Жефф Безосын сүйт бүсгүй байсан Лорен Санчес зэрэг дан эмэгтэйчүүдээс бүрдсэн багийг 60 гаруй жилийн дараа анх удаа сансар луу илгээсэн юм.
Эх сурвалж: МОНЦАМЭ Агентлаг Д.Жаргал
