Улсын аварга О.Хангай бөхийн өргөөний барилдаанд 40 дэхээ түрүүллээ

Улаанбаатар, 2026 оны гуравдугаар сарын 23 /МОНЦАМЭ/. Үүрэн телефоны “Мобиком” корпорацын 30 жилийн ойн нэрэмжит улс, аймаг, цэрэг, сумын алдар цолтой чансаа өндөр 128 бөхийн барилдаан Монгол бөхийн өргөөнд боллоо.

Тус барилдаанд Ховд аймгийн Буянт сумын харьяат, “Аврагч” спорт хороо, “Ховд” дэвжээний бөх, улсын аварга О.Хангай түрүүлж, Сэлэнгэ аймгийн Цагааннуур сумын харьяат, “Алдар” спорт хороо, “Таван Хан” дэвжээний бөх, арслан Б.Орхонбаяр үзүүрлэв. О.Хангай аварга энэ улиралд хоёр түрүүлж, хоёр үзүүрлэн, нэг удаа их шөвөгт шалгараад байна. Түүнчлэн бөхийн өргөөний барилдаанд 40 дэхээ түрүүлэв. Тэгвэл улсын арслан Б.Орхонбаяр энэ улиралд хоёр түрүүлж, хоёр үзүүрлэжээ.

Их шөвөгт Баянхонгор аймгийн Жинст сумын харьяат, “Алдар” спорт хороо, “Тэргүүн Богд” дэвжээний бөх, улсын арслан Э.Батмагнай, Төв аймгийн Өндөрширээт сумын харьяат, “Сүлд” спорт хороо, “Нэгдэл” клуб, “Дүнжингарав” дэвжээний бөх, заан Д.Хүдэрбулга нар шалгарлаа. Дунд шөвөгт улсын заан Д.Анар, М.Лхагвагэрэл, С.Сүхбат, өсөх идэр начин Л.Энхсаруул нар үлдэв.

Барилдааны түрүү бөх 30 сая, үзүүрлэсэн нь 15, их шөвөг 5.0, дунд шөвөгт шалгарсан нь 2.0 сая төгрөг гардсан байна. Түүнчлэн нэг давааг 300 мянган төгрөгөөр байллаа.

Үүнээс гадна шилдэг 16 бөхөөс хамгийн их санал авсан улсын аварга О.Хангай, арслан Э.Батмагнай, Б.Орхонбаяр, заан М.Лхагвагэрэл нарын дунд халз барилдаанд зохион байгууллаа. Энэхүү барилдаанд улсын арслан Э.Батмагнай түрүүлж, заан М.Лхагвагэрэл үзүүрлэв. Халз барилдааны түрүү бөх 20, үзүүр 10, дөрөвт үлдсэн бөхчүүд 5.0 сая төгрөг гардсан юм.