МОСКВА, 2026 оны тавдугаар сарын 9 /TASS/. Москва хотын Улаан талбайд Ялалтын баярын сүрт жагсаал ёслол төгөлдөр болж өнгөрлөө. Кремлийн хонх цохисны дараа хүндэт харуулын цэргүүд ОХУ-ын төрийн далбаа болон Ялалтын тугийг Улаан талбайд залж авчирлаа.

Парадыг командлагч, ОХУ-ын Зэвсэгт хүчний Хуурай замын цэргийн командлагч, хурандаа генерал Андрей Мордвичёв ОХУ-ын Батлан хамгаалахын сайд Алексей Белоусовт ёслон, цэргүүд жигдрэн жагсаж сүрт жагсаалд оролцоход бэлэн болсныг илтгэв. А.Белоусов, А.Мордвичёв нар Орост үйлдвэрлэсэн "Aurus" маркийн задгай лимузин автомашинаар парадад оролцохоор хайрцаглан жагссан цэргийн эгнээг тойрон явж мэндчиллээ.

Үүний дараа цэргийн найрал хөгжимд уламжлал ёсоор “Иван Сусанин” дуурийн “Славься” гэдэг дуу эгшиглэх үед Батлан хамгаалахын сайд А.Белоусов индэрт гарч, цэргүүд парадад бэлэн болсныг ОХУ-ын зэвсэгт хүчний Ерөнхий командлагч В.Путинд илтгэв.

Парадыг нээж ерөнхийлөгч В.Путин үг хэлэхдээ “өнөөдөр бид өвөг дээдэстээ чин сэтгэлээсээ талархан энэхүү Ялалтын баярыг тэмдэглэж байна” хэмээн онцлон дурдлаа.

Тэрбээр цааш нь хэлэхдээ, Аугаа их Эх орны дайн эхэлсний 85 жилийн ой энэ онд тохиож буйг дурдаад, 1941 оны 6 дугаар сарын 22 бол Оросын түүхэн дэх хамгийн эмгэнэлт өдөр байсныг сануулав. Ялалтын баяр бол Орос орны хувьд хамгийн гол ариун баяр учраас нэн бахархалтайгаар тэмдэглэдэг болохыг ерөнхийлөгч Путин тэмдэглэн хэллээ.

Оросын үйл хэрэг үнэн зөв учраас ялалт бидний талд үргэлж байсаар ирсэн бөгөөд цаашид ч байх болно хэмээн Оросын төрийн тэргүүн онцлон тэмдэглээд “бидний амжилтын үндэс суурь бол ёсзүй ба ёс суртахууны хүч, эрэлхэг зориг, нэгдэл нягтрал болон ямар ч сорилтыг даван туулах чадвар юм” гэлээ.

“Бид Зөвлөлтийн ард түмний гавьяаг үргэлж дурсах болно. Тэд нацизмыг бутниргэхэд шийдвэрлэх чухал үүргийг гүйцэтгэсэн бөгөөд улс орноо, дэлхий дахиныг аварсан билээ. Тэд өршөөлгүй хорон нүглийг эцэс болгож, Гитлерийн Германы өмнө буун өгч, түүний үйлдсэн гэмт хэргүүдэд дуулгавартайгаар хамсан оролцож байсан улс орнуудад тусгаар тогтнолыг нь эргүүлэн өгсөн” гэдгийг ерөнхийлөгч В.Путин сануулав. Өнөө цагийн тухайд тэрбээр өгүүлэхдээ, Оросын эрдэмтэд, инженерүүд хамгийн орчин үеийн, хосгүй зэвсэглэлүүдийг зохион бүтээж, бөөнөөр нь үйлдвэрлэж эхэлснийг дурдлаа.

Ерөнхийлөгч үг хэлж дууссаны дараа ёслолд оролцогчид Аугаа их Эх орны дайнд амиа алдсан ЗХУ-ын иргэдийн дурсгалыг хүндэтгэн нэг минут дуугүй зогссоны дараа цэргийн сүрт жагсаал эхэллээ.

Парадад ОХУ-ын зэвсэгт хүчний бүх төрөл цэргийн анги нэгтгэлүүдийн албан хаагчид, цэргийн дээд сургуулиудын сонсогчид, цэргийн тусгай ажиллагаанд оролцож буй цэргүүд Улаан талбайгаар жагсан өнгөрлөө. Мөн Курс мужийг чөлөөлөхөд оролцсон Солонгосын Ардын армийн байлдагчид анх удаагаа Ялалтын парадад оролцов.

ОХУ-ын Батлан хамгаалахын яамны мэдээллээр, тус парадад цэргийн тусгай ажиллагаанд оролцож буй 1000 цэргийг оролцуулаад нийт 11 мянга гаруй цэргийн албан хаагч оролцжээ.

Энэ удаагийн парадад цэргийн техникийн цуваа, мөн Суворов, Нахимовын цэргийн сургуулиуд болон кадетын корпусын сурагчид оролцсонгүй.

Парадын үеэр Улаан талбайд байрлуулсан том дэлгэцээр цэргийн тусгай ажиллагаанд үүрэг гүйцэтгэж буй цэргийн албан хаагчид, мөн Стратегийн пуужинт цэрэг, Агаар-сансрын хүчний удирдлагын цэгүүд, байлдааны хөлөг онгоцууд дээр жижүүрлэн үүрэг гүйцэтгэж буй албан хаагчдын үйл ажиллагааг харууллаа. Түүнчлэн "Герань", "Иноходец" зэрэг нисгэгчгүй онгоцууд болон "Пересвет" гэдэг байлдааны лазерын цогцолбор тулалдааны талбарт хэрхэн ажиллаж буйг үзүүлэв.

Үүний дараа ОХУ-ын Агаар-Сансрын хүчний "Русские Витязи" баг Су-30СМ нисэх онгоцоор, "Стрижи" баг "МиГ-29" сөнөөгч болон "Су-25" дайрагч онгоцуудаар уран нислэгийн үзүүлбэрээ толилуулж, Орос улсын төрийн далбааны гурван өнгөөр тэнгэрийг чимэглэснээр Аугаа Эх орны дайны ялалтын 81 жилийн ойд зориулсан ёслолын парад сүр жавхлантайгаар өндөрлөлөө.

Парад дууссаны дараа Ерөнхийлөгч В.Путин индэрт байгаа ахмад дайчид болон цэргийн тусгай ажиллагаанд оролцож буй албан хаагчидтай халуун дотноор ярилцав. Дараа нь тэрбээр цэргийн сүрт жагсаалыг үзэхээр Москвад хүрэлцэн ирсэн Лаосын ерөнхийлөгч Тонглун Сисулит, Беларусийн ерөнхийлөгч А.Лукашенко, Казахстаны ерөнхийлөгч К.Токаев, Узбекистаны ерөнхийлөгч Ш.Мирзиеев, Малайзын султан Ибрагим, Өмнөд Осетийн ерөнхийлөгч Алан Гаглоев, Абхазын ерөнхийлөгч Бадра Гунба, Босни Херцеговин улсын ерөнхийлөгч Синиша Каран, Словакийн ерөнхий сайд Р.Фицо нарын хамтаар Улаан талбай дундуур алхсаар Александрын цэцэрлэгт очиж, Нэр нь үл мэдэгдэх цэргийн булшинд цэцэг өргөв.

Эх сурвалж: МОНЦАМЭ Агентлаг Б.Адъяахүү