МОСКВА, 2026 оны наймдугаар сарын 10 /РИА НОВОСТИ/. Аргентины Росарио хотноо удтал хүндээр өвчилсний эцэст Лионел Мессигийн эцэг Хорхе Месси 68 насандаа таалал төгсжээ. Өчигдөр Лео эцэгтэйгээ салах ёс гүйцэтгэхээр төрөлх хотдоо ирсэн байна.

Хорхе ямар хүн байсан, дэлхийн аварга хүүгийнхээ тамирчны замналд ямар үүрэг гүйцэтгэсэн талаар Риа Новости агентлагийн сэтгүүлч Борис Ходоровский ийнхүү бичжээ.

***

Мессигийн аав нь эрүүл мэндийн хувьд сайнгүй байсан гэдэг нь саяхан болж өнгөрсөн ДАШТ-ий үеэр тодорхой болсон юм. Алжирын шигшээгийн хаалганд эхний гоолоо оруулсныхаа дараа Лионел нулимсаа барьж дийлсэнгүй. Тэрбээр тоглолтын дараа хэлэхдээ “уйлсан минь хөл бөмбөгтэй холбоогүй ээ” гэснээс өөр зүйл хэлээгүй юм.

Энэ үеэр Аргентины телевизийн нэгэн сувгийн хөтлөгч эмэгтэй эфирээр ярихдаа, Мессигийн эцэг нь нас барсан тухай мэдээг цацжээ. Хожим тэрбээр үүнийхээ төлөө уучлал гуйсан боловч түүнийг ажлаас нь халсан байна.

Харамсалтай нь энэ удаад Хорхе Месси нас барсан тухай мэдээ үнэн байлаа. Залуудаа Хорхегийн тоглож байсан хөл бөмбөгийн "Ньюэллс Олд Бойз" багийн цахим хуудсанд нийтлэгдсэн албан ёсны мэдэгдэлд “"Ньюэллс Олд Бойз"-ын үнэнч хөгжөөн дэмжигч минь үүрд баяртай. Хорхе хатуу чанд хүн байсны зэрэгцээ өөрийн хайр энэрлээрээ өсвөрийн багийн тоглогчийг дэлхийн хөл бөмбөгийн од болгосон билээ” хэмээн дурджээ.

Залуу байхдаа Хорхе Месси залуучуудын хөл бөмбөгийн "Ньюэллс Олд Бойз" багт хагас хамгаалагчаар тоглож байв. Гэвч цэрэгт татагдсанаар түүний хөлбөмбөгчний замнал зогсчээ. Аргентины армид өөрийн гэсэн баг үгүй тул мэргэжлийн хөлбөмбөгчний замналаас татгалзахаас аргагүйд хүрэв. Химийн техникч мэргэжил эзэмшсэн тэрбээр цэргээс халагдсаныхаа дараа төрөлх хотдоо эргэн ирж, гангийн үйлдвэрт ажиллах болов. Хорхе эхнэрийн хамт дөрвөн хүүхэд өсгөснөөс гурван хүүгээ хөлбөмбөгчин болгохыг мөрөөддөг байлаа. Энэ мөрөөдлийг нь зөвхөн Лионел биелүүлсэн бөгөөд ирээдүйн од тамирчны туулсан замнал тийм ч дардан байсангүй.

Тэрбээр 13 настайдаа хүүхдийн өсөлтийг дарангуйлдаг дааврын өвчин туссан тул яаралтай эмчлэх шаардлагатай болов. Гэвч Мессигийн гэр бүл сар бүр эмчилгээнд 900 доллар гаргах боломжгүй байлаа. "Ньюэллс Олд Бойз" клуб ч энэ зардлаас хуваалцахыг хүссэнгүй. Эмчлүүлэхийн тулд Леог “Ривер Плейт” академид оруулах гэсэн боловч бүтэлгүйтэв.

Ингээд Хорхегийн гэр бүлийнхэн Барселона хотыг зорьсон нь тун зөв шийдвэр болж, тэдэнд аз тохиолоо.

“Барса”-гийн менежерүүд 13 настай Аргентины легионерийг багтаа авахыг зөвшөөрч, эмчилгээнийх нь төлбөрийг даах, эцэг эхийг нь байр сууцаар хангахаар тохиролцжээ. Энэ талаарх анхны гэрээг зоогийн газарт салфеткан цаасан дээр бичиж үйлдсэн нь домог яриа биш бөгөөд уг салфетк өнөөг хүртэл хадгалагдан үлдсэн байна.

Каталоны нийслэлд өнгөрүүлсэн эхний он жилүүд тун амаргүй байлаа. Аргентин гэр бүлийнхэн шинэ улсад дасан зохицоход хэцүү байсны зэрэгцээ Лионелийн хөлбөмбөгчний замнал Хорхегийн хүсэж байсанчлан тийм ч ахицтай байсангүй. Эх нутагтаа буцах тухай бодол ч төрж эхлэв. Харин Лионел Испанид үлдэж, Европын хамгийн хүчтэй клубүүдийн нэг болох “Барселона”-д бэлтгэлээ үргэлжлүүлэх хүсэлтэй байгаагаа эцэгтээ хэлжээ.

“Аав минь үргэлж миний дэргэд байсан, бид хамтдаа маш олон бэрхшээлийг даван туулсан юм. Би өрөөгөө түгжиж байгаад ганцаараа уйлж байв. Аав минь мөн адил надад нулимсаа үзүүлэхгүйн тулд ингэж байлаа” хэмээн 2007 онд Месси Radio del Plata радиостанцад ярилцлага өгөхдөө өгүүлж байв. 20 гаруй жилийн туршид Хорхе үргэлж хүүгийнхээ дэргэд байж, эрх ашгийг нь хамгаалж ирсэн юм. Хүү нь авьяастай учраас ийм хэмжээний мөнгөн шагнал авах ёстой гэж тэрбээр хэлэлцээний үеэр хатуу байр суурь баримталж байв. Залуу авьяаслаг хүүтэй байгуулсан гэрээний мөнгөн дүн жилээс жилд өсөж, тэрбээр насанд хүрсэн тамирчдаас илүү цалин хөлс авах болсонд “Барса”-гийн фанатууд ихэнхдээ гайхдаг байлаа. Гэвч төдий удалгүй Месси ямар агуу авьяастан болох нь тодорхой болсон тул гэрээний тухай яриа хөөрөө дахин гарсангүй.

Испанийн төлөө тоглохыг хориглосон нь

Лионел олон жилийн турш Аргентины шигшээгийн ахлагч, манлайлагч, од байсан нь чухамдаа Хорхетой холбоотой. 2003 онд Испанийн хөл бөмбөгийн холбоо залуучуудын ДАШТ-д оролцох хөл бөмбөгчдийнхөө урьдчилсан мэдүүлгийг өгөхөд Сеск Фабрегас, Пике нарын зэрэг ирээдүйн оддын хамт Лионел Мессигийн нэр багтсан байлаа. Тухайн үед 15-хан настай байсан Мессиг дэлхийн хөл бөмбөгийн ирээдүйн од болно ярилцдаг байсан юм.

Хэдийгээр Лионел Испанийн иргэншилгүй байсан боловч энэ асуудлыг тун амархан шийджээ. Эцэг эх нь хоёулаа испани гаралтай тул тэрбээр 2005 онд Испанийн паспорттай болов. Харин Хорхегийн байр суурь тун ч хатуу байлаа. Тэрбээр “төрөлх улс орныхоо багт тоглох хэрэгтэй, үүний тулд багахан хугацаанд тэвчээртэй хүлээх нь зүйтэй” хэмээн хүүгээ ятгах болов.

Испанийн хөл бөмбөгийн холбоо Лионелийг олон удаа ятгаж байсан боловч тэрбээр эцгийнхээ хэлснийг дагаж, Испанийн багт тоглохоос татгалзсаар байв.

Хүүгийнхээ тамирчны замналын туршид Хорхе түүний ажил хэргийн чанартай бүхий л асуудлыг хариуцан шийдэж байсан юм. “Барса”-д санхүүгийн хүндрэл үүссэний дараа Хорхе хүүгээ ПСЖ, дараа нь “Интер Майами”-д шилжүүлэн тоглуулах асуудлаарх хэлэлцээнд оролцож байв. Мессигийн нэрийг ашигласны төлбөр, үл хөдлөх хөрөнгө, зоогийн газрын бизнес зэрэгтэй холбоотой бүхий л асуудлыг Хорхе хариуцаж байсан тул Лионел зөвхөн хөл бөмбөгтөө бүхий л анхаарлаа төвлөрүүлэх боломжтой болсон юм. Харин Хорхе олны нүднээс далд байх дуртай хүн.

Хүүгийнх нь замналын оргил болох 2022 оны ДАШТ-д Аргентины шигшээ баг түрүүлэх мөчийг харах ховорхон завшаан Хорхед заяасан билээ. Лионелийн авьяасыг дэлхий даяараа биширч байлаа. Хэрвээ эцэг нь бүхий амьдралаа хүүгийнхээ хөлбөмбөгчний замналд зориулаагүйсэн бол алс хязгаар нутгийн Росарио хотод төрсөн хүүгийн нэрийг дэлхий дахин мэдэхгүй байх байсан болов уу.

Эх сурвалж: МОНЦАМЭ Агентлаг Б.Адъяахүү