Ж.Инфантино дөрөв дэх удаагаа сонгогдох эрхгүй гэжээ

ЛОНДОН, 2026 оны наймдугаар сарын 19 /ТАСС/. Ашгийн бус FairSquare гэдэг байгууллагаас ФИФА-гийн Удирдлага, аудит, дүрмийн хороонд хандан захидал илгээж, тус холбооны одоогийн ерөнхийлөгч Жанни Инфантино уг албан тушаалд дахин сонгогдох эрхгүй гэдгийг хүлээн зөвшөөрөхийг шаардсан байна.

Хэрвээ Инфантино дахин сонгогдох аваас энэ нь түүний хувьд дөрөв дэх удаагаа сонгогдсон хэрэг болох бөгөөд ФИФА-гийн дүрэмд зааснаар нэг хүн 3-аас дээш удаа ерөнхийлөгчөөр сонгогдох эрхгүй гэдгийг захидалд сануулжээ. Харин Инфантино өмнө нь мэдэгдэхдээ “миний бие эхний удаад ФИФА-гийн ээлжит бус их хурлаас сонгогдсон тул эхний бүрэн эрхийн хугацааг тооцох ёсгүй” хэмээн хариулж байв.

Мөн хэд хоногийн өмнө FairSquare байгууллагаас Инфантиногийн үйлдэлтэй холбоотойгоор Олон улсын Олимпын хороонд /ОУОХ/ гомдол гаргажээ. Энэ нь АНУ-ын шигшээ багийн довтлогч Фоларин Балогуны тоглолтод оролцох эрхийг хассан шийдвэрийг цуцалсанаас үүдэлтэй юм. Уг шийдвэрийг АНУ-ын Ерөнхийлөгчийн зүгээс Инфантинод улс төрийн шахалт үзүүлсний улмаас гаргасан бөгөөд ингэснээр тэрбээр Лозанн хот дахь ОУОХ-ны төв байранд 2020 онд өргөсөн тангаргаа зөрчсөн гэж FairSquare үзжээ. Гэвч ОУОХ гомдлыг авч хэлэлцэхээс татгалзсан байна.

Сануулан дурдахад, Босни Херцеговин улсын багтай хийсэн шөвгийн 32-ын тоглолтын үеэр Балогун пүүзнийхээ хадаасаар хамгаалагч Тарик Мухаремовичийн хөл рүү өшиглөсөн учир улаан хуудас авч талбайгаас хөөгдсөн юм. Харин 7 дугаар сарын 5-нд ФИФА-гийн Сахилга батын хорооны шийдвэрээр дараагийн тоглолтод оролцох эрхгүй болоод байсан Балогуны эрхийг сэргээсэн тул тэрбээр Бельгитэй хийсэн шөвгийн 16-гийн тоглолтод оролцсон билээ. Хожим нь сэтгүүлч Бен Жейкобс бичихдээ, Цагаан ордноос утасдсаны дараа ФИФА дээрх шийдвэрийг гаргасан гэжээ.

Өдгөө 56 настай Ж.Инфантино 2016 оны хоёрдугаар сард болсон ээлжит бус чуулганаар ФИФА-гийн ерөнхийлөгчөөр сонгогдсон юм. Дараа нь тэрбээр уг албан тушаалд хоёр удаа өрсөлдөгчгүйгээр нэр дэвшин ялсан байна. ФИФА-гийн тэргүүний дараагийн сонгууль 2027 оны гуравдугаар сард болно.

Эх сурвалж: МОНЦАМЭ Агентлаг Б.Адъяахүү