.png){kind=logo}
Хүнс, хөдөө аж ахуй, хөнгөн үйлдвэрийн салбарт 2022 онд хэрэгжүүлсэн арга хэмжээ, 2023 оны гол зорилт, үйл ажиллагааг хэрэгжүүлэх талаар хэлэлцэж, нэгдсэн бодлого чиглэлээ илүү тодорхой болгох зорилготой "Удирдах ажилтны сургалт-семинар болж байна.
Энэхүү үйл ажиллагаанд Хүнс, хөдөө аж ахуй, хөнгөн үйлдвэрийн сайд Х.Болорчулуун, Дэд сайд М.Ганхүлэг, Төрийн нарийн бичгийн дарга Т.Жамбалцэрэн, Сайдын зөвлөх Б.Батбаатар, яамны, газар хэлтсийн дарга, харьяа байгууллагын дарга, захирал, 21 аймгийн Хүнс, хөдөө аж ахуйн дарга, Мал үржлийн албаны дарга нар оролцож байна.
Сайд Х.Болорчулуун тус үйл ажиллагааг нээж хэлсэн үгэндээ "Хөдөө аж ахуйн салбарын хөрөнгө оруулалтыг нэмэгдүүлэх, түүхий эдийн бэлтгэн нийлүүлэлтийн тогтолцоог хоршооны бүтцэд тулгуурлан бий болгох замаар үндэсний үйлдвэрийг чанартай түүхий эдээр тасралтгүй хангах, эдийн засгийн эргэлтийг нэмэгдүүлэх, хөдөө аж ахуйн бүтээгдэхүүний аюулгүй байдлыг хангах, хүн амын хэрэгцээт гол нэрийн бүтээгдэхүүнийг дотоодын үйлдвэрлэлээр бүрэн хангах, алдагдаж буй боломжийг ашиглан экспортыг нэмэгдүүлэх зорилгыг хэрэгжүүлэхэд жижиг, дунд үйлдвэр, үйлчилгээ эрхлэгч, хоршоологчдын оролцоо зайлшгүй чухал байгааг дурдаад хөдөө аж ахуйн салбарын өмнө байгаа томоохон зорилт, үйл ажиллагааг хэрэгжүүлэхэд төр, хувийн хэвшил, төрийн байгууллагуудын хамтын бүтээлч, санаачилгатай ажиллагаа нэн чухал байгаа" гэж онцолсон юм.
Дэд сайд М.Ганхүлэг "Алсын хараа 2050" Монгол Улсын урт хугацааны хөгжлийн бодлого, Бодлого, төлөвлөлтийн газрын дарга Ц.Болорчулуун "Шинэ сэргэлтийн бодлого"-ын хүрээнд Хүнс, хөдөө аж ахуй, хөнгөн үйлдвэрийн салбарт 2023 онд дэвшүүлсэн зорилт, орон нутагт хэрэгжүүлэх ажил, Хяналт-шинжилгээ, үнэлгээ, дотоод аудитын газрын дарга Б.Санчирдорж аймгуудын Хүнс, хөдөө аж ахуйн газрын 2022 оны үйл ажиллагааны гүйцэтгэлд хийсэн хяналт-шинжилгээ, үнэлгээний дүнгийн тухай тус тус танилцуулж байна.
