.png){kind=logo}
Улаанбаатар /МОНЦАМЭ/. Мөсний хоккейн спортын Ази, Номхон далайн орнуудын 18 хүртэлх насны өсвөрийн аварга шалгаруулах тэмцээн маргааш “Мөсөн өргөө”-нд эхлэх гэж байна.
Олон улсын шайбтай хоккейн холбооны Ази, Номхон далайн Стратеги, төлөвлөлтийн бүлэг 2022 оны 10 дугаар сард Абу Даби хотноо гишүүн улс орнуудын холбоодын төлөөлөлтэй стратеги, улирлын бэлтгэл, үнэлгээ, зохицуулалтын талаар танилцуулсан хуралдааны үеэр Азийн залуучуудын хоккейн АШТ-ийг Монголд зохион байгуулах шийдвэр гаргасан юм.
Монгол Улсын хувьд Үндэсний шигшээ баг болон залуучуудын хоёр багт нийт 50 гаруй тамирчин бэлтгэлд гарч, “Мөсөн өргөө”-нд бэлтгэлээ хангаж байгаа. Шигшээ багийн тамирчдыг Улаанбаатар, Дархан, Эрдэнэт, Бугант зэрэг газраас сонгон шалгаруулалтаар бүрдүүлсэн бөгөөд тэд Цагаан сарын дараа шууд бэлтгэлдээ гарсан. Манай улсад болох тэмцээнд Монгол, Индонез, Энэтхэг, Иран, Макао, Сингапур, Тайланд, Арабын Нэгдсэн Эмират, Узбекистан улсын шигшээ гэсэн есөн багийн 198 тамирчин өрсөлдөнө” гэж мэдээлж байсан ч зардал мөнгөний улмаас 3 орон оролцож чадахгүй гэдгээ мэдэгдсэнээр тивийн аварга шалгаруулах тэмцээн 6 орны тамирчдын өрсөлдөөн дунд болохоор товлогдоод байна.
Цар тахлын улмаас 2020, 2021 онд завсарласан тэмцээн гуравдугаар сарын 11-17-ны хооронд үргэлжлэх бөгөөд Монгол, Иран, Тайланд, Туркменистан, АНЭУ, Узбекистан гэсэн зургаан орны баг өрсөлдөх юм.
Тоглолтын хуваарь:
2023.03.11
13:30. АНЭУ - Тайланд
17:00. Узбекистан - Туркменистан
20:30. Монгол - Иран
2023.03.12
13:30. Тайланд - Туркменистан
17:00. Иран - Узбекистан
20:30. Монгол - АНЭУ
2023.03.14
13:30. Тайланд - Иран
17:00. Монгол - Узбекистан
20:30. АНЭУ - Туркменистан
2023.03.15
13:30. Иран - АНЭУ
17:00. Туркменистан - Монгол
20:30. Узбекистан - Тайланд
2023.03.17
13:30. Туркменистан - Иран
17:00. АНЭУ - Узбекистан
20:30. Тайланд - Монгол
Өнөөдрийн 15 цагийн байдлаар Монголын шигшээ багийн ахлах дасгалжуулагч, Олон улсын Хоккейн холбооны эксперт, ОУХМ А.Мэргэнтэй холбогдоход, “Яг зочдоо хүлээж авах гээд нисэх рүү явж байгаа тул ямар нэгэн мэдээлэл өгөх зав зай тун бага байна” гэсэн бол хэвлэл мэдээллийн төлөөлөгч н.Зулбэх “Ирсэн зочин багууд мөсөн талбайтайгаа танилцаж бэлтгэлээ хангаж байна. Дөнгөж сая гэхэд Узбекистаны баг бэлтгэлээ хийгээд гарлаа” гэсэн юм. Одоогоор Туркменистаны багийнхныг хүлээж байгаа аж. Нэг багт 15 тоглогч гэж бодохоор доод тал нь 90 хүн, тэгээд дасгалжуулагч болоод албаны хүмүүсийг нэмж тооцвол дор хаяж 200 гаруй хүн долоо хоногийн турш Монголын "Мөсөн өргөө"-нд “чуулах” нь дээ. Хөгжөөн дэмжигчдийг оруулаагүй шүү.
Маргааш анхны тоглолт 13 цаг 30 минутад АНЭУ - Тайландын багийн хооронд болно. Энэ долоо хоног мөсөн спортын хувьд гайхан бишрэх, харамсан халаглах олон үйл явц давхцах нь дээ.
Н.Саранчимэг
