Говийн биологийн олон янз байдлыг судлах хүрээлэнг нээлээ

Улаанбаатар, 2026 оны хоёрдугаар сарын 6 /МОНЦАМЭ/. Монголын өмнөд бүсийн экосистемийг судлах, хамгаалах зорилготой Говийн биологийн олон янз байдлын хүрээлэн (GoBI)-г албан ёсоор өчигдөр /2026.02.05/ нээлээ.

Уг хүрээлэн говийн экосистемийг урт хугацаанд системтэй судалж, бодлого боловсруулах түвшинд шинжлэх ухааны үндэслэлтэй мэдээлэл өгөх үндэсний төв болох юм. Энд говийн бүсийн биологийн олон янз байдлын мониторинг, зэрлэг амьтдын популяцийн судалгаа, экосистемийн уян хатан байдлын үнэлгээ, газар ашиглалт, уул уурхайн нөлөөллийн шинжилгээг хийхээр төлөвлөжээ. Мөн бодлого боловсруулагчдад зориулсан дата мэдээлэлд суурилсан зөвлөмж боловсруулах чиглэлээр ажиллах ажээ.

Говийн бүс нь Монголын төдийгүй Төв Азийн хуурай бүсийн экологийн тогтвортой байдалд чухал үүрэгтэй. Дэлхийн хуурай газрын 40 орчим хувь нь доройтож, 3.2 тэрбум хүний амьжиргаанд нөлөөлж буй энэ үед Монголын говь уур амьсгалын өөрчлөлт, цөлжилттэй тэмцэх олон улсын судалгааны чухал талбар болохыг мэргэжилтнүүд онцолж байна.

Манай улс НҮБ-ын Цөлжилттэй тэмцэх тухай конвенцын Талуудын 17 дугаар бага хурлыг (COP17) наймдугаар сард зохион байгуулахын өмнө уг хүрээлэнг нээж байгаа нь онцгой ач холбогдолтой юм.

Байгаль орчны бодлого шинжлэх ухаан, өгөгдөлд суурилах ёстойг БОУАӨЯ-ны Төрийн нарийн бичгийн дарга Ш.Батбаяр нээлтэд оролцох үеэрээ хэлсэн үгэндээ онцлоод, “Монгол Улсын газар нутгийн 76 гаруй хувь нь ямар нэг хэлбэрээр доройтож, сүүлийн 70 жилд агаарын дундаж температур 2.3 хэмээр нэмэгдсэн. Иймд уриа лоозонгоор бус, судалгаа, дата мэдээлэлд үндэслэн байгалиа хамгаалах шаардлагатай”-г тэмдэглэлээ.

Тус хүрээлэн нь ашгийн бус, бие даасан шинжлэх ухааны байгууллага хэлбэрээр ажиллаж, үндэсний болон олон улсын судалгааны байгууллага, төр, хувийн хэвшил, олон улсын түншийн хамтын ажиллагааг нэгтгэх зорилготой. Ингэснээр манай улс шинжлэх ухаанд суурилсан байгаль хамгаалах бодлогоо шинэ шатанд гаргаж, дэлхийн тогтвортой ирээдүйд хувь нэмэр оруулах нөхцөл бүрдэж байна.

Эх сурвалж: МОНЦАМЭ Агентлаг Б.Оюундэлгэр