.png){kind=logo}
Азийн аварга шалгаруулах 21 дэх удаагийн шатрын тэмцээн 2026 оны 5 дугаар сарын 28-наас 6 дугаар сарын 7-ны өдрүүдэд Монгол Улсын нийслэл Улаанбаатар хотноо зохион байгуулагдана.
Энэхүү нэр хүндтэй тэмцээн нь Азийн шилдэг шатарчдыг нэг дор цуглуулдаг тивийн хэмжээний хамгийн өндөр зэрэглэлийн тэмцээн бөгөөд энэ удаа Монголын шатрын холбооны ерөнхийлөгч Г.Занданшатарын санаачлагаар Монгол Улс анх удаа эх орондоо хүлээн авч байгаа гэдгээрээ онцлог юм.
Энэ удаагийн тэмцээнд Азийн 26 орны нийт 240 гаруй шилдэг шатарчид өрсөлдөхөөр мэдүүлгээ ирүүлээд байна. Тодруулбал, ОХУ, БНХАУ, Энэтхэг, Казахстан зэрэг хүчирхэг орнуудын шатарчид оролцоно. Нээлттэй ангилалд 143, эмэгтэй ангилалд 101 шатарчин оюун ухаанаа сорин өрсөлдөнө. 
Монголын шатарчид Азийн аварга шалгаруулах тэмцээнээс олон удаа өндөр амжилт үзүүлж байсан түүхтэй. Тухайлбал: ИМ Ц.Батчулуун — шагналт 5-р байр (Чэндү, 2017), эмэгтэй ИМ Т.Мөнхзул — хүрэл медаль (Синтай, 2019, ОУМ болон эмэгтэй ИМ Б.Мөнгөнтуул — хүрэл медаль (Алматы, 2023, эмэгтэй ОУМ Б.Мөнгөнзул — мөнгөн медаль (Аль Айн, 2025) хүртэж байжээ.
Энэхүү тэмцээн нь зөвхөн спортын үйл явдал төдигүй Монгол Улсын олон улсын нэр хүнд, спортын хөгжилд өндөр ач холбогдолтой. Түүнчлэн тэмцээний нээлттэй ангиллын эхний 5 байр, эмэгтэй ангиллын аварга шатарчин 2027 оны Дэлхийн цомын тэмцээнд оролцох эрх авах юм.
Тэмцээнийг Монголын шатрын холбоо зохион байгуулах бөгөөд уг томоохон тэмцээнийг эх орондоо зохион байгуулах бэлтгэл ажлыг эрчимтэй хангаж байна. Манай улс олон улсын томоохон шатрын тэмцээнүүдийг эх орондоо амжилттай зохион байгуулсан туршлагатай. Тухайлбал: ФИДЕ Эмэгтэйчүүдийн Гран-При (2010), 16 хүртэлх насны Олимпиад (2015), Өсвөрийн шатарчдын Азийн АШТ (2016), Азийн залуучуудын АШТ (2018), Азийн 3.3 бүсийн АШТ (2019, 2025), Ахмадын Азийн АШТ (2024), Сурагчдын Азийн АШТ (2025) зэрэг тэмцээнүүд багтаж байна.
Азийн шилдэг шатарчдын оргил тулаан Монгол Улсад зохион байгуулагдаж байгаа нь Улаанбаатар хот тивийн оюуны спортын төвүүд нэг болж буйн илрэл юм.
Тэмцээний танилцуулгыг дараах холбоосоор орж үзнэ үү.
https://drive.google.com/.../1f80wJvC8ZtKnoe2XR.../view...
Тэмцээний жагсаалтыг дараах холбоосоор орж харна уу.
Нээлттэй ангилал --> https://s3.chess-results.com/tnr1399377.aspx?lan=1&art=0...
Эмэгтэй ангилал --> https://s1.chess-results.com/tnr1399378.aspx?lan=1&SNode=S0
МОНГОЛЫН ШАТРЫН ХОЛБОО
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!