.png){kind=logo}
НЬЮ-ЙОРК, 2026 оны зургаадугаар сарын 22 /TASS/. Америкийн эмч нар түүхэнд анх удаа ХДХВ-ний халдвар тээгчээс дархлалын олдмол хомсдолтой өөр нэг өвчтөнд уушги шилжүүлэн суулгах мэс заслыг амжилттай хийжээ. Ингэснээр ойрын ирээдүйд ХДХВ-ний халдвартай өвчтөнүүдэд уушгины донор олдох боломжийг ихээхэн нэмэгдүүлнэ гэж Нью-Йоркийн их сургуулийн Анагаах ухааны сургуулийн (NYUSM) хэвлэлийн алба мэдээлсэн байна.
"Бид өмнө нь ХДХВ-тэй нэг өвчтөнөөс уг вирусийг тээгч өөр өвчтөнд зүрх болон хэвлийн хөндийн эрхтнүүдийг шилжүүлэн суулгах мэс засал хийж байсан боловч уушгины хувьд ийм ажилбар урьд өмнө хэзээ ч хийж байгаагүй. Тиймээс урьд өмнө хэн ч зүрхэлж байгаагүй энэхүү туршилтад оролцох зориг гаргасан өвчтөндөө талархал илэрхийлье" гэж NYUSM-ийн дэд профессор Марк Сонник ярилаа.
Сонник болон бусад эрдэмтдийн тайлбарлаж байгаагаар, одоо мөрдөгдөж буй эрх зүйн хэм хэмжээнүүд нь ХДХВ-ний халдвартай өвчтөнүүдэд хийгдэх мэс заслыг, ялангуяа эрхтэн шилжүүлэн суулгах ажилбаруудыг үлэмж хэмжээгээр хязгаарладаг байна. Тухайлбал, АНУ-д 2013 оныг хүртэл дархлалын олдмол хомсдолтой донороос эрхтэн шилжүүлэн суулгах өвчтөн нь ХДХВ-ний халдвартай байсан ч ямар нэгэн эрхтэн шилжүүлэн суулгах нь эрүүгийн гэмт хэрэгт тооцогддог байжээ.
Харин саяхнаас л эрдэмтэд, эмч нар ХДХВ-тэй өвчтөнөөс уг вирусийг тээгч бусад хүмүүст эрхтэн аюулгүй шилжүүлэн суулгах протоколыг боловсруулж, ийм төрлийн туршилтуудыг хийж эхэлсэн байна. Тухайлбал, Сонник болон түүний хамтран зүтгэгчид 2000 онд ХДХВ-ний халдвар авч, уушгийг гэмтээдэг үрэвсэлт өвчин болох саркоидозоор шаналж байсан 56 настай өвчтөнд уушги шилжүүлэн суулгах мэс заслыг амжилттай хийжээ.
Уг өвчтөн 2021 онд бактерийн халдвар авсны дараа саркоидоз өвчин нь сэдэрч, улмаар уушгийг нь төдийгүй элгийг нь гэмтээж эхэлсэн тул эмнэлгийн орон дээр хиймэл амьсгалын аппарат залгуулахаас аргагүйд хүрчээ. Эдгээр хүндрэлүүдийн улмаас өвчтөн давхар эрхтэн шилжүүлэн суулгах туршилтад оролцох шийдвэр гаргаснаар энэ оны гуравдугаар сард ХДХВ-ний халдвартай донороос уушги болон элгийг хамтад нь шилжүүлэн суулгасан байна.
Мэс засал амжилттай болж, өвчтөн сүүлийн дөрвөн жилд анх удаа бие даан амьсгалж, хөдөлж эхэлсэн байна. Энэхүү амжилт нь ХДХВ-ийн халдвар тээгч олон олон хүний амьдралын чанарыг сайжруулж, амь насыг нь аврах замыг нээж өгч байгааг эрдэмтэд онцолжээ.
Эх сурвалж: МОНЦАМЭ Агентлаг Г.Энх-Од
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!