Неймар 980 хоногийн дараа Бразилын шигшээ багийн төлөө тоглолоо

ВАШИНГТОН, 2026 оны зургаадугаар сарын 25 /TASS/. Бразилын хөл бөмбөгийн шигшээ багийн түүхэн дэх шилдэг мэргэн бууч Неймар 980 хоногийн дараа анх удаа үндэсний шигшээ багийнхаа төлөө талбайд гарлаа.

Тэрбээр Дэлхийн аварга шалгаруулах тэмцээний (ДАШТ) хэсгийн шатны гуравдугаар тойрогт Шотландын багтай хийсэн тоглолтын 76 дахь минутад сэлгээгээр талбайд гарчээ. Довтлогч Неймар шилбэний гурвалсан булчингийн гэмтлийн улмаас тэмцээний эхний хоёр тоглолтыг өнжөөд байсан юм.

Бразилын шигшээ баг Шотландын багийг 3:0 харьцаатайгаар буулган авснаар плей-оффын шатанд шалгарлаа. АНУ-ын Флорида муж улсын Майами хотод болсон тоглолтын гоолуудыг Винисиус (7 болон 45+3 дахь минут), Матеус Кунья (60 дахь минут) нар оруулжээ. Бразилчууд нийт 7 оноотойгоор С хэсгийг тэргүүлээд байгаа бол энэ хэсгийн нөгөө тоглолтод Мароккогийн шигшээ баг Хаитийн багийг 4:2-оор хожсоноор мөн адил 7 оноотой болсон ч нэмэлт үзүүлэлтээр бразилчуудын ард бичигдсэн байна. Харин Шотландын баг 3 оноотойгоор 3 дугаар байрт орсон бол Хаитийн баг (0 оноо) хүснэгтийн сүүлийг мушгилаа.

Бразилын баг зургаадугаар сарын 29-нд 1/16 шигшээд F хэсгийн 2-р байраар шалгарсан багтай тоглоно. Тус хэсгийн 2-р байрт орохын төлөө Нидерланд, Япон болон Шведийн шигшээ багууд өрсөлдөж байгаа юм. Харин Мароккогийн шигшээ баг зургаадугаар сарын 30-нд 1/16 шигшээд F хэсгийг тэргүүлсэн багтай тоглоно.

Өдгөө 34 настай Неймар Бразилын шигшээ багийн төлөө хамгийн сүүлд 2023 оны 10 дугаар сарын 18-нд тогложээ. Тэрбээр үндэсний шигшээ багийнхаа бүрэлдэхүүнд Олимпын алт, мөнгөн медаль хүртсэнээс гадна, Холбоодын цомын тэмцээний аварга болж, Америкийн цомын тэмцээний шигшээ тоглолтод шалгарч байсан юм. Неймар Бразилын шигшээ багийн төлөө хамгийн олон гоол (79) оруулсан дээд амжилтыг эзэмшдэг. Энэ удаагийн тоглолт нь түүний шигшээ багийнхаа төлөө хийсэн 129 дэх тоглолт болж байна.

Неймар оролцсон бүх дэлхийн аваргын тэмцээндээ бэртлийн асуудалтай тулгарч байв. Тэрбээр 2022 оны ДАШТ-ий хэсгийн шатанд Сербийн шигшээ багийг 2:0-ээр хожсон тоглолтын үеэр бэртэл авч байсан. Мөн 2018 онд Неймар баруун хөлийн тавхайн бэртлээсээ болж гурван сарын турш эмчилгээ хийлгэн, бүрэн эдгэрч чадалгүй ОХУ-д болсон ДАШТ-д оролцож байсан юм. Харин 2014 онд нутагтаа болсон ДАШТ-ий үеэр тэрбээр нурууны бүсэлхийн хэсгийн гуравдугаар нугалмаа хугалж, Германы багтай хийсэн хагас шигшээ тоглолтыг (1:7) өнжихөөс өөр аргагүйд хүрч байв.

Эх сурвалж: МОНЦАМЭ Агентлаг Д.Жаргал