.png){kind=logo}
ХОНКОНГ, 2026 оны зургаадугаар сарын 26 /SCMP/. Хонконгийн эмч нар бичил мэс заслын шинэ хөтөлбөрийн хүрээнд амьд донороос роботын тусламжтайгаар элэг шилжүүлэн суулгах мэс заслыг дэлхийд анх удаа амжилттай хийсэн тухай "South China Morning Post" сонинд мэдээлжээ.
Хонконгийн их сургуулийн судалгааны багийн мэдээлснээр, Хатан хаан Мариягийн нэрэмжит эмнэлгийн мэргэжилтнүүд өнгөрсөн оноос хойш роботын тусламжтай технологийг ашиглан 48 мэс заслыг амжилттай хийжээ. Эдгээр бүх мэс засал нь хожуу илрэх эсвэл мэс заслын дараах хүндрэл үүсээгүй амжилттай болсон байна.
Энэхүү шинэ технологи нь 0.1 мм хүртэлх зузаантай нарийн бүтэцтэй ажилладаг уламжлалт бичил мэс заслын хязгаарлагдмал байдлыг даван туулж чаджээ. "Мэс засалчдад тулгардаг гол бэрхшээл нь олон цагаар эвгүй байрлалд ажилласнаас болж ядрах, гар чичрэх асуудал байдаг. Харин роботжуулсан систем нь эдгээр асуудлыг шийдэж, мэс засалчдын суралцах хугацааг ч багасаж байна" хэмээн эмч Велда Чоу Линю ярилаа.
Роботын тусламжтай мэс заслын үед эмч зориулалтын тухтай сандалд сууж, жойстик (удирдах гар) ашиглан роботын манипуляторуудыг удирддаг. Тусгай 3D шилний тусламжтайгаар мэс заслын талбарыг дэлгэцээр олон дахин томруулж, орон зайн баримжаатайгаар хардаг байна. Энэхүү систем нь эмчийн гарын хөдөлгөөнийг роботын үйлдэл болгон өндөр нарийвчлалтайгаар хөрвүүлэх бөгөөд хурууны чичрэлтийг зогсоож өгдөг ажээ.
Уг технологийг нэг жилийн өмнөөс туршиж эхэлсэн бөгөөд одоогийн байдлаар хэдэн арван өвчтөн роботын тусламжтай мэс засалд оржээ. Энэхүү технологийг хавдар авах, тунгалгийн системийн мэс засал болон гэмтэл бэртлийн эмчилгээнд ашиглаж байсан бол энэ оны дөрөвдүгээр сард амьд донороос элэг шилжүүлэн суулгах мэс заслыг дэлхийд анх удаа амжилттай хийсэн байна.
Элэг шилжүүлэн суулгах төвийн захирал Альберт Чан Чи-яны хэлснээр, хамгийн нарийн төвөгтэй ажил бол 1-2 мм-ийн голчтой элэгний артерийн судсыг холбох байдаг гэнэ. Хэрэв уг судас бөглөрвөл шилжүүлэн суулгасан эрхтэн ажиллагаагүй болж, өвчтөний амь насанд аюул учирдаг байна. Робот нь хүний хүчин зүйлээс шалтгаалсан алдааг арилгаж, оёдлыг маш нарийн хийж гүйцэтгэдэг ажээ.
Хонконгийн мэргэжилтнүүд энэхүү бичил мэс ажилбарын роботуудыг улсын эмнэлгүүдийн өдөр тутмын үйл ажиллагаанд нэвтрүүлэхээр төлөвлөж байгаа бөгөөд одоогоор судалгааны багийнхан уг системийг цөсний сувгийн мэс засалд ашиглах боломжийг судалж байна.
Эх сурвалж: МОНЦАМЭ Агентлаг Д.Жаргал
